Fakapapau'i 'oku 'ikai lava fakahoko 'i Tonga ni tesi ‘Ikale Tahi mo Uelesi Featured
Timi 'Ikale Tahi lolotonga hono ta 'o e sipi tau
18 Fepueli, 2017. Kuo fakamahino mei he Poate ‘Akapulu ‘a Mamani ‘e ‘ikai malava ke fakahoko mai ‘a e tesi ‘a e ‘Ikale Tahi mo Uelesi na’e ‘amanaki fakahoko mai ki Tonga ni ‘i he ‘aho 17 ‘o Sune.
Ko e fakaha ‘eni ‘e he Sea ‘o e Poate ‘Akapulu ‘a mamani Bill Beaumont ki he ongoongo ‘a e kautaha Planet Rugby.
‘I he fakamatala ‘a Beaumont na’a ne fakamahino ai ‘oku nau ongo’i fakataha mo Tonga ni ‘a e mole ko’eni ‘a e faingamalie ma’a Tonga ka ‘oku mahino mai koe ngaue ke fakahoko ki he teuteu ‘o e pa’ake Teufaiva ‘oku fu’u tomui mama’o ia mei he palani na’e fai kiai ‘a e ‘amanaki.
‘I he tu’unga fakavaha’a pule’anga foki kuo pau ke fakahoko leva ha fealelea’aki kei taimi ia ki ha feitu’u ke fakahoko kiai ‘a e va’inga ko’eni he kuo panaki ‘a Sune pea ke lava foki ke fakahoko ‘i he taimi totonu na’e kotofa kiai.
‘I ha fakamatala ‘a e Sea Union ‘Akapulu ‘a Uelesi Gareth Davies na’a ne fakaha ai na’a nau ‘amanaki kotoa mo palani ‘e fakahoko mai ‘a e va’inga ko’eni ki Tonga ni pea koe ‘uhinga ia na’a nau tautoloi ai ke fakamahino ha ‘aho pau kiai.
‘Oku mahino pe foki ia ki he ongoongo ni ‘oku te’eki pe ke fakahoko ha ngaue ia ki he pa’ake Teufaiva pea ‘oku te’eki ke mahino ia pe kuo talaki ha kautaha kene fakahoko ‘a e ngaue ni.
‘E tu’ulahoko ai pe foki ‘a e tesi ia ‘a Uelesi moe timi Manu Samoa ‘a ia ‘e fakahoko pe ia ki ‘Apia he ‘aho 24 ‘o Sune ai pe.
Na’e toutou ‘ohake pe foki ‘a e kaveinga ni ‘e he ngaahi kautaha ongoongo pea na’e toutou fakamahino mei he Palemia ‘e malava pe ke fakahoko ‘a e va’inga ko’eni.
Kaikehe kuo mahino mai ‘eni ‘a e tukunga ‘oku ‘i ai mo e siva 'etau 'amanaki ka ‘oku kei fiema’u pe foki 'a e poupou ia 'a e fonua ki he’etau fanau va’inga.
