Fili Takitoa Taumoepeau ke Pule Lahi/Sekelitali Seniale TASANOC Featured
Takitoa Taumoepeau ke Pule Lahi/Sekelitali Seniale TASANOC
25 'Okaptopa, 2016. Na’e tali ‘e he Poate Pule ‘a e Komiti Sipoti Fakafonua mo e ‘Olimipiki ‘a Tonga (TASANOC) ‘a Takitoa Taumoepeau ke ne hoko ko e Sekelitali Seniale mo e Pule Lahi ‘o e ‘ofisi ‘o e TASANOC lolotonga ‘enau fakataha ‘i he Falaite kuo ‘osi, 21 ‘Okatopa.
Ko e fili ko eni ko e ola ia ‘o e liliu ki he Konisitutone ‘a e TASANOC ‘a ia ‘oku ‘ikai ke to e fili ‘a e lakanga ni ‘e he Fakataha Lahi ka ‘oku fili ia ‘e he Poate Pule ‘a e TASANOC.
Na’e faifatongia ai pe foki ‘a Takitoa ‘i he lakanga ‘i he tu’unga faka-taimi hili ‘a e fili lakanga lolotonga ‘o e Fakataha Lahi Fakata’u ‘a e TASANOC ‘i Sune. Na’e ngaue leva ‘a e Poate Pule ki hono teuteu mo tu’uaki atu ‘a e lakanga ‘o fakatatau ki he founga ngaue.
Na’e fakahoko ‘e Takitoa ‘ene fakamalo ki he Palesiteni mo e Poate Pule ki he falala kuo tuku ange mo kole pe ‘enau poupou mo e ngaue fakataha. Na’a ne tanaki ‘o pehe ko e pole eni ki ai mo e TASANOC ki hano hiki ‘o e ngaue ki he tu’unga lelei ange pea mo e teuteu atu ‘a Tonga ke fakahoko ‘a e Sipoti hono XVI ‘a e Pasifiki he 2019.
