'Amanaki fakamanatu kainga Mamonga ta’u 100 fokotu'u Misiona Tonga Nuku’alofa. Featured
Ko hono vali 'e he kau faifekau Mamonga 'a 'aa 'o e Palasi faka-Tu'i teuteu ki he Hilifaki Kalauni 2015
3 'Aokosi, 2016. ‘Oku ‘amanaki ke fakamanatu ‘i he mahina ni ‘e he Siasi ‘o Sisu Kalaisi mo e Kau Ma’oni’oni ‘o e Ngaahi ‘Aho ki Mui ni ‘a e lava kakato ‘a e ta’u ‘e 100 hono fokotu’u ‘o e Misiona Tonga Nuku’alofa.
‘Oku ‘amanaki leva ke fakahoko ‘a e ngaahi ouau fakamanatu ‘o e fuofua tu’uta ‘a e kau fuofua Misinale ‘o e Siasi ni ‘i he kelekele ‘o Tonga pea ‘e fakahoko ia ‘i he ‘aho 8 ‘o ‘Aokosi. ‘E fakahoko ha fakatu’uta ‘a e kaingalotu mo honoau hala ki he Tama Tu’i ‘i he Palasi faka-Tu’i ‘i he ‘aho 9 ‘Aokosi pea koe ‘aho 10 leva ‘o ‘Aokosi ko e katoanga ki he tukuifakaholo mo e anga faka-fonua ‘e fakahoko ia ki he Pa’ake Teufaiva.
‘E fakahoko ha houa Taumafa mo e ‘ilo ho’ata ‘i he ho’ata ‘o e ‘aho 11 ‘o ‘Aokosi, polo fakalangilangi ‘i he po’uli hifo ‘o e ‘aho 12 ‘Aokosi pea ‘e fakahoko mo e ouau fakalotu ‘i he ‘aho 14 ‘o ‘Aokosi ai pe.
‘I ha fakamatala ‘a ‘Aisake Tukuafu koe taha ‘o e kau taki ma’olunga ‘o e Siasi ‘o Sisu Kalaisi mo e Kau Ma’oni’oni ‘o e Ngaahi ‘Aho ki Mui ni ‘i Tonga ni ki he loki ongoongo ‘a e Siasi ni, na’a ne fakaha ai ‘a ‘enau ongo’i fiefia ‘i hono a’usia ‘a e makamaile ko’eni ‘e he siasi ‘i Tonga ni.
Na’e toe fakaha foki ‘e Tukuafu ‘a e ‘ofa ‘a e kau memipa ‘o e siasi ‘i he fonua, fale ‘o e Tu’i, ngaahi kaungame’a ‘i he ngaahi fungavaka kehe mo e kaunga memipa ‘o e siasi. Na’e faka’osi ‘aki ;e Tukuafu ‘ene fakamamafa’i koe ‘enau taumu’a ke tokoni mo langahake ‘a e taautaha, ngaahi famili mo e ngaahi komuiniti ‘o fakatatau ki he akonaki ‘a Sisu Kalaisi.
