Na'e ha 'i he ongoongo 'a e 89. 5 'o e pongipongi 'o e 'aho ni 'a hono faka'eke'eke 'e he Letio 89.5 'a e 'Eiki Palemia fekau'aki moe tohi fehu'i 'a 'Eliesa Fifita 'o e 'aho 14 'o Sanuali 2015. Na'e me'a foki 'a e 'Eiki Palemia 'o pehe ko hono fakangaue'i 'a hono foha Po'oi Pohiva 'oku makatu'unga pe ia 'i he falala kakato 'iate ia ki he tokotaha ni neongo ko hono foha pea 'e faingofua ange pe ia kiate ia 'i ha toe taha kehe.

Faka'eke'eke mo Dr. Viliami Uasike Latu

‘Oku ou fakamalo lahi ki he Nepituno Media ‘i he ma’u faingamalie ko’eni ke fakahoko atu ai ha fakalavelave ki he tu’unga ‘o e ngaahi fakahoko fatongia ma’a e Kapineti ‘a ‘Ene ‘Afio mo e Falealea ‘o Tonga ‘i he ta’u faka Falealea kuo tau situ’a kiai. Neongo ‘oku fele mo fafo ‘a e ngaahi me’a ‘oku tonu ke fai atu ai ha tasilisili ka teu lave atu pe ki ha konga si’i. ‘Oku ‘ikai foki ke puli ‘a e mo’oni ko’eni ko kimautolu ni kau ngaue faka politikale ‘i he fa’unga fo’ou ko’eni ‘oku tau fononga’ia mai ‘oku mau ha’u pe mo ‘alu ka ‘oku ‘ikai ke ‘uhinga ia ‘e tu’u ai ‘a e ngaue ‘a e Pule’anga mo e Fonua. ‘Oku maau malie pe foki ‘a e ngaahi palani ngaue ia ‘a e Pule’anga mo e Fonua ‘a ia ‘oku fakata’u hongofulu pea kuopau ke lele hokohoko pe ia neongo ‘a e fetongitongi ‘a e kau ‘Eikivaka pehe ki he kau kauvaka.