Fakafuakava'i kau memipa ki he Fale Alea pea 'ikai tali kole 'a Piveni Piukala
23 Novema 2022. Na'e lava lelei hono fakafuakava’i he houa pongipongi e 'aho ni ‘a e kau Memipa fo'ou ki he Fale Alea 'o Tonga.
Ko e kau Fakafofonga Fale Alea fo'ou ko'eni ko e Fakafofonga 'o e Kakai ‘o Tongatapu 6 - Dulcie Tei, Fakafofonga Kakai fo’ou ‘o Tongatapu 7 Piveni Piukala pea mo e Fakafofonga Kakai ki Fale Alea ‘o e vahenga fili Tongatapu 4, ko Mateni Tapueluelu.
Na'e tuku mai foki ki he Hou'eiki Memipa 'e he 'Eiki Sea 'o e Fale Alea ke fakahoko ha feme'a'aki fekau'aki mo e kole 'a e Fakafofonga fo'ou 'o Tongatapu 7 ke fakahoko 'a hono fakafukava'i ia 'i he lea faka-Pilitania.
Na'e fakafepaki'i fefeka 'eni 'e he Hou'eiki Memipa 'o e Fale 'o fakatatau ki he tu'utu'uni 'a e Konisitutone mo e Tu'utu'uni Ngaue 'a e Fale Alea pea na'e iku ke fuakava 'a e Fakafofonga Tongatapu 7 'i he lea faka-Tonga pe 'oku fakatatau mo e Konisitutone pehe ki he founga ngaue mo e tu'utu'uni ngaue 'a e Fale Alea.
