Fe'auhi 'a Eke mo Sovaleni ki he lakanga Palemia Featured
8 Tisema, 2021. Kuo mahino mai 'i he'ene tu'u he 'aho ni kuo toe pe 'a e kanititeiti 'e tokoua ki hono veipaa'i 'a e lakanga Palemia 'o e fonua 'a ia koe Minisita Ako Lolotonga Siaosi Sovaleni pea mo Dr. 'Aiaske Valu Eke.
Kuo fakaha mahino ia 'e Dr. Pohiva Tu'i'onetoa 'a ia ko e Palemia lolotonga ia 'o e fonua pea na'a ne toe ikuna 'a e sea 'o e Vahenga Fili Tongatapu 10 he fili Fale Alea 'o e 'aho 18 'o Novema 2021 kuo holomui ia mei ha'ane toe hoko atu koha kanititeiti ki he lakanga Palemia kae poupou leva ia kia Dr. 'Aisake Eke kene hoko koe kanititeiti kena veipa mo Sovaleni.
'Oku lolotonga lele foki 'a e alea 'a e ongo tafa'aki pea koe ongoongo 'oku ma'u fakamuimui 'e he ongoongo ni 'oku tautau toko 7 'a e kemi 'o Sovaleni mo Eke pea koe kau Fakafofonga leva 'e toko 3 'oku te'eki ke mahino pe 'oku nau tu'u 'i fe.
'I he taimi tatau kuo 'osi mahino ia koe tafa'aki 'e fili kiai 'a e tokolahi taha 'o e Hou'eiki Memipa 'o e Nopele koe tafa'aki ia tene ikuna 'a e fili Palemia.
'Oku 'i ai foki 'a e longoa'a, laaulea mo e talanga mo faka'uhinga 'a e ngaahi mitia mo e kakai 'o e fonua fekau'aki mo e kaveinga ni ka 'oku 'ikai foki ke fo'ou 'a e founga ia ko'eni mo e nanunga 'o e alea 'oku fakahoko ki ha fili Palemia talu mei he Fili Fale Alea 'o e ta'u 2010 hili ia 'a e liliu 'a e fonua ki he fa'unga faka-Temokalati.
Ko Sovaleni na'e kau foki ia 'i he Kapineti 'a Dr. Tui'onetoa pea ko Dr. 'Aisake Eke koe hu fo'ou mai ia 'i he fili Fale Alea 'o e ta'u ni ma'a e Vahenga Tongatapu 5 neongo na'e 'osi 'i he Fale Alea pe kimu'a.
'Oku taku foki 'e he tokolahi 'o e fonua ko e fili fakapotopoto 'eni na'e fakahoko 'e he kakai 'o e fonua 'i he 'aho 18 'o Novema 2021 'o fakatatau mo e finangalo 'o e Tama Tu'i pea koe toko 17 ko'eni kuo fili mai 'oku 'i ai 'a e lelei taha kuo fili mai 'e he fonua 'i he hisitolia 'o e Fili Fale Alea.
