Fakahū ki he Fale Alea fokotu’u fili fakahā loto ke fakahifo ‘a e Palēmia ^Featured

Ko e fokotu’u ko’eni ‘oku fakahū atu ia ‘e he ni’ihi ‘o e Hou’eiki Mēmipa ‘o e Fale Alea pea ‘oku mahino ‘oku makatu’unga ‘eni ‘i he ‘ikai kenau fiemalie ki hono tataki ‘e he Palēmia ‘a e fonua ‘o pehē ki hono tukuaki’i ‘o e Palēmia ki he ngaahi faihala ‘i hono fatongia faka-Palēmia mo e founga ‘oku fakamoleki ‘aki ‘a e pa’anga tukuhau ‘a e kakai.

Kuo ma’u foki ‘e he ongoongo ni ia mo e fakamatala falala’anga ‘oku kau pe mo e ni’ihi ‘i he Kapineti ‘i he poupou ki he fokotu’u ko’eni pea ko e konga lahi ‘o e ta’efiemālie ko e lahi ‘a e fakaongoongo ‘a e Palēmia ia ki he’ene tangata fale’i mo Tokoni Sea ‘i he’ene Paati Fakapolitikale (Paati ‘a e Kakai) kae tuku ‘a e Kapineti ia mo e ni’ihi na’a nau fili ia.

‘Oku lahi foki ‘a e longoa’a ‘a e fonua mo hono fehu’ia ‘a e kaunga ‘o ‘Etuate Lavulavu ki he Pule’anga ka ‘oku ‘ikai ‘i ai ha tali mahino ia mei he Pule’anga.

Ko e fokotu’u kiha Fili Fakahā Loto ke fakahifo ‘a e Palēmia koe totonu ia kuo foaki ‘e he Konisitūtone ki he Hou’eiki Mēmipa ‘o e Fale Alea pea ‘oku malava ke fakahoko ia ‘i he hili ‘a e mahina ‘e 18 ‘a e hoko ha Palēmia ki he lakanga.