Fakafoki 'e he Pule'anga Ngaahi Lao Fakaangaanga 'e 16 mei he Fale Alea ^Featured

Na'e malōlō foki 'a e Fale Alea 'i he uike 'e 11 talu mei he kongaloto 'o Sune 'o e ta'u ni 'o a'u mai ki he 'aho 8 'o Sepitema ke alea'i 'a e ngaahi Lao Fakaangaanga 'e 18 'a e Pule'anga pea toki hoko atu 'a e 'a'ahi faka-Fale Alea.

Ko 'eni kuo mahino mai kuo loto e Pule'anga ke fakafoki 'a e ngaahi Lao Fakaangaanga 'e 16 kae tipeti'i pe 'a e Lao Fakaanganaga 'e 2 'a ia ko e Lao Fakaangaanga ki he Tukiuhau 2020 mo e Lao Fakaangaanga ki he Tukuhau Ngāue'aki 2020 'a ia na'e malava ia 'o fakapaasi 'i he 'aho tatau.

Ko e taumu'a foki hono fakafoki 'e he Pule'anga 'enau ngaahi Lao Fakaangaanga ke toe fakahoko hano vakai'i ka 'oku tupu heni 'a e ta'efiemālie lahi 'i he ni'ihi 'o e Hou'eki Mēmipa he kuo 'osi mole 'a e taimi mo e pa'anga 'a e Fale Alea 'i hono alea'i 'a e ngaahi Lao Fakaangaanga ko'eni 'i he Komiti Lao.

Na'e 'ohake 'a e hoha'a ko'eni 'e he Fakafofonga Nōpele Fika 2 'o Vava'u Sea 'o e Komiti Kakato Lord Tu'i'afitu pea na'e nofo 'ene hoha'a he taimi mo e pa'anga kuo mole he feme'a'aki fekau'aki mo e ngaahi Lao Fakaangaanga ko'eni.

Na'e fokotu'u foki 'e he Fakafofonga 'o e Kakai 'o Tongatapu 9 Penisimani Fifita ke alea'i 'a e Lipooti Fakata'u 'a e ngaahi Potungāue 'a e Pule'anga kapau 'oku toloi 'a e ngaahi Lao Fakaangaanga 'a e Pule'anga.

'Oku 'ikai ngata ai ka na'e 'ikai toe ha toe 'asenita kehe 'a e Fale Alea ka koe taumu'a pe ki he Ngaahi Lao Fakaangaanga ko'eni 'a ia na'e 'osi palani 'i he 'asenita ngāue 'a e Fale.

'E hoko atu 'a e feme'a'aki 'a e Fale 'i he 'aho Mōnite 21 'o Sepitema 2020.