Fakata'e'aonga'i 'a e Memipa 'a Lord Fusitu'a 'i he Fale Alea 'o Tonga Featured
Lord Fusitu'a
7 'Aokosi, 2020. Kuo tu’utu’uni ‘e he ‘Eiki Sea ‘o e Fale Alea Lord Fakafanua ‘o kamata lau mei he ‘aho 6 ‘o ‘Akosi 2020 ke ‘atā ‘a e sea ‘o e Fakafofonga ‘o e Hou’eiki Nopele ‘o Niua Fo’ou mo Niua Toputapu ‘a ia na’e fakafofonga ‘e Lord Fusitu’a ki he Fale Alea 'o Tonga.
Ko e tu’utu’uni ko’eni ‘oku fakahoko pe ia ‘o fakatatau ki he kupu 7 ‘o e Lao ki he Fale Alea ‘o Tonga ‘a ia ‘oku hā mahino pe ai ‘oku ‘ikai ngofua ke li’aki ha Memipa Fale Alea ‘o laka hake he mahina ‘e 12 mei he Fale Alea ‘o Tonga.
‘I he’ene pehe leva kuo pau ke fakahoko ‘a e fili si’i ki ha Fakafofonga Nopele ma’a e ongo Niua pea ko e tu’utu’uni koia ‘e aofangatuku kiai ‘a e Komisoni Fili hili 'i ha fetu’utaki mei he Sea ‘o e Fale Alea ‘o fakatatau mo e kupu 6 ‘o e lao ki he Fale Alea ‘o Tonga.
Na’e mama’o foki ‘a Lord Fusitu’a mei he Fale Alea ‘o Tonga ‘o laka hake he mahina ‘e 12 ko’eni makatu’unga he tengetange na’e hoko kiate ia 'o talu mei he 'aho 5 'Aokosi 2019.
'Oku te'eki ke mahino ha taimi ke fakahoko ai 'a e fili si'i ko'eni.
