Fekau’i Ke Foki Ki ‘Api Ko ‘Ene Teunga Faka-Tonga ^Featured

Na’e fakahā ‘e he matāpule ni ki he ongoongo ‘a e Televīsone ‘a Nu’usila na’a ne ongo’i lotomamahi ‘i hono fekau ia ke foki ki ‘api he na’e ‘uhinga ‘ene teunga faka-Tonga he ko e uike ‘eni ‘oku fakamamafa’i ai ‘a e lea Faka-Tonga ‘e he kainga Tonga ‘i Nu’usila pea na’a ne pehe kene faka’ilonga’i.

Kaikehe ko e teunga foki ‘o e ‘apiako ni ‘oku sote hinehina mo e talausese loloa ‘uli’uli pea mo e hekesi ‘uli’uli ka na’e tupenu ‘uli’uli foki ‘a e matāpule ni mo ta’ovala pea ne hekesi ‘uli’uli. Na’e fakahoko pe foki ‘a e kole fakamolemole mei he ‘apiako ni ki he matāpule ni pea na’a nau fakahā pe ‘oku ‘i ai ‘a ‘enau fakakaukau kenau toe fakatokanga’i ange ‘a e ngaahi tukufakaholo faka-fonua kehe ka ‘oku mahu’inga pe foki ke tauhi ‘a e tu’utu’uni ‘a e ‘apiako ki he teunga.

Na’e fakahā ‘e he Fakafofonga ‘o e vahenga hahake ‘o Manukau ki he Fale Alea Nu’usila Jenny Salesa ki he ongoonga 'a e Televīsone 'Uluaki 'a Nu'usila hili ha kole fale’i kiai ‘a Adrian Lynch ‘oku mahu’inga pe ke faka’apa’apa’i ‘e he ngaahi ako’anga pehe ki he ngaahi ngāue’anga ‘a e tukufakaholo ‘o e ngaahi matakali kehe he ‘oku mahu’inga pe moia ke fakatokanga'i.

Na’e fakahā foki ‘e Lynch ‘e foki ki he ako ‘apongipongi ('aho hono hoko) he ‘oku loto pe ke faka’osi ‘ene feinga ako ‘oku fakahoko he 'apiako ni. 'Oku lolotonga kātoanga'i foki 'e he Kainga Tonga 'oku fakapaea 'i Nu'usila 'a e Uike Lea Faka-Tonga pea 'oku poupoua 'a hono fakahoko 'eni.

Ma'unga Ongoongo: Televīsone Nu'usila