'A'ahi mai Tokoni Palēmia Nu'usila ki Tonga ni
8 Fepueli 2024. Na'e tu'uta mai ki Tonga ni 'a e Tokoni Palēmia 'o Nu'usila Hon. Winston Peters pehe ki he'enau Minisitā Mo'ui mo e Kakai 'o e Pasifiki Hon. Dr Shane Reti 'i he efiafi Tusite 6 'o Fepueli ni pea ko e konga 'eni 'enau polokalama 'a'ahi ki he ngaahi fonua 'o e Pasifiki 'o kau ai 'a Ha'amoa mo Cook Islands.
Na'e talitali lelei 'e he 'Eiki Minisitā Ki Muli Fekitamoeloa 'Utoikmanu pehe ki he 'Eiki Minisitā Fefakatau'aki Hon. Dr. Viliami Uasike Latu 'a e Tokoni Palēmia 'o Nu'usila pehe ki he'ena kau folau 'i he Mala'evakapuna Fua'amotu.
Na'e fakahoko ai pe he 'aho Pulelulu 7 'o Fepueli 'a e fakataha 'a Hon. Peters mo e 'Eiki Palēmia Le'ole'o Samiu Vaipulu pehe ki he Hou'eiki Memipa 'o e Kapineti 'i he pongipongi 'aneafi 'a ia na'e fakahoko pe ki he 'Ofisi 'o e Palēmia.
Ko e ngaahi me'a na'e fakahoko kiai 'a e alēlēa 'a e ongo tafa'aki na'e fekau'aki tonu ia mo e langa fakalakalaka faka'ikonomika, ako, mo'ui, polokalama toli fo'i'akau, tu'unga malu 'a e vahenga Pasifiki pehe ki he 'amanaki tokoni 'a e Pule'anga Nu'usila ke langa ha Fakamaau'anga ma'a Tonga mo e ngahai kaveinga kehe pe.
Na'e hoko atu ai pe ki he kau atu 'a Hon. Peters mo 'ene kau folau ki hono hopoki 'a e Fale Tuku'anga faito'o 'a e Potungaue Mo'ui 'i Veitongo pea ko e poloseki ko 'eni na'e fakapa'anga 'e he Pule'anga Nu'usila.
Na'e foki atu ai pe kau folau he efiafi 'aneafi pea koe taulanga hoko na'a nau folau kiai ko Ha'amoa.
