Hopoki Tama Pilinisi Kalauni Vakapuna Twin Otter Series 400 Lulutai Airlines
Tama Pilinisi Kalauni Tupou To'a 'Ulukalala he'ene me'a 'a'ahi ki he loto vakapuna fo'ou
18 Novema, 2023. Na'e hopoki 'e he Tama Pilinisi Kalauni Tupou To'a 'Ulukalala 'ane afi 'a e Vakapuna fo'ou Twin Otther Series 400 'a e Kautaha Lulutai Airlines.
Na'e me'a 'i he Katoanga ni mo e Ta'ahine Pilinisesi Kalauni Sinaitakala Tuku'aho pehe ki he 'Eiki Palemia Hon. Hu'akavameiliku, Hou'eiki Minisita Kapineti, Hou'eiki Fakafofonga Fale Alea, Kau Fakafofonga Ngaahi Pule'anga muli mo e kau fakaafe tokolahi.
Ko e Vakapuna fo'ou ni koe kalasi Twin Otter Series 400 sea 19 pea 'e tokoni lahi ia ki hono fakasi'isi'i ange 'a e palopalema 'i he fepuna'aki fakalotofonua fakatatau ki he fakamatala 'a e CEO 'o e Kautaha Lulutai Airlines Poasi Mataele Tei.
'Oku mahino mai foki mei he fakamatala 'a e CEO 'a e Lulutai pehe ki he me'a 'a e 'Eiki Palemia, Haikomisiona 'Aositelelia ki Tonga Racheal Moore pehe ki he 'Eiki Minisita ki he Ngaahi Ngaue Lalahi Hon. Seventeen Toumo'ua 'a ia 'oku malumalu ai 'a Va'a Fefolau'aki Vakapuna Sivile koe kalasi vakapuna 'eni 'oku pau pea lelei hono hisitolia ki he malu 'a e fefolau'aki vakapuna.
Ko e kalasi vakapuna ko'eni 'oku kau pea 'iloa 'i he STOL (Short takeoff and landing) 'a ia 'oku lava 'o to mo puna 'i a lele'anga 'oku nounou pea 'oku fe'eunga 'eni moe ngaahi mala'evakapuna he 'otu motu 'o kau ai 'a 'Eua mo e Ongo Niua.
Ko e kalasi vakapuna Twin Otter Series 400 'oku fa'u 'ehe Kautaha Canada koe De Havilland pea koe talu mei ta'u 1965 'a hono fa'u 'o e kalasi vakapuna ko'eni 'o feliuliuaki ai pe fakatatau ki he laka, liliu mo e 'alu 'a e taimi.
Na'e fakamalo'ia 'e he 'Eiki Palemia 'a e tokoni 'a e Pule'anga 'Aositelelia ki hono fakapa'anga 'a e pa'anga 'e 1.5 miliona ki hono fakatau mai 'o e vakapuna ni pe he ki he Kautaha Fakafonua ki he Pa'anga Malolo 'enau tokoni 'i hono fakahoko 'a e noo ki hono fakatau mai 'a e vakapuna ko'eni pea 'i ai foki mo honau sea 'i he Kautaha Vakapuna Lulutai.
Ko e vakapuna 'aki 'eni hono 3 'a e Kautaha Lulutai Airlines pea 'oku kei tu'u pe foki 'i he visone 'a e Kautaha Lulutai ke toe 'omai moha vakapuna 'i he kaha'u kene feau 'a e ngaahi fiema'u fepuna'aki fakalotofonua tautautefito ki he taimi mo'umo'ua 'o kau ai 'a e taimi mamata tofua'a 'i he Vahefonua Vava'u.
