Fakataha hono 9 ‘a e Kautaha Vai ‘a e Pasifiki ^Featured

‘Oku ‘i Nuku’alofá ni ai e kau fakafofonga mei he ngaahi Fonua memipa ‘o e PWWA, Ngaahi Poate Vai ‘o e Pasifiki mo e ngaahi memipa tokoni kotoa pē ke nau kau ki he ngaahi alelea ‘i he konifelenisi ‘aho e 4 ko ení ‘i he kaveinga ko e, “Our Water, Our People”.

‘I he me’a fakaava ‘a e ‘Eiki Palēmiá ‘o e fakataha’angá na’á ne pehē ai ‘oku mahu’inga ‘a e kaveingá ni ki hotau kakai mo hotau ngaahi Fonua takitaha.

“Oku mahu’inga pea felāve’i ‘aupito ‘a e kaveingá ni ki hotau kakaí. ‘Oku tau ‘ilo ‘oku ‘ikai ngata pe ‘i he fekau’aki pē ‘a e vaí ki he mo’uí ka ko e vai ko e mo’ui ia hotau kakai pea ‘oku ‘ikai ha toe me’a mahu’inga ange ai.”

“’Oku toe fakamanatu mai ‘i he fakatahá ni ‘a e ngaahi pole ‘oku fe’ao mo e ngaahi sekitoa vai ‘i he Pasifikí ‘o kau ki ai mo e ngaahi me’a ‘oku ne fakatupunga ‘a e ngaahi pole ‘i he ngaahi liliu fakamāmani lahí.”

“He’ikai ke malava ‘o leleiange e ngaahi sosaieti ‘i he Pasifikí ‘i he ta’emalava ke ma’a, lahi pea ngāue’aki leleiange e ngaahi ma’u’anga vaí. ‘Oku fakamanatu mai ‘e he konifelenisí ni ‘a e ngaahi tefito’i palopalema ‘oku kei ‘asi ‘i he Pasifikí ‘o kau ki ai mo e ngaahi fonua lalahi ‘o māmani ‘e hoko ko ha ngaahi palopalema ‘i he kaha’ú ka ‘oku te’eki ke fu’u ‘asi ‘i he ‘ahó ni,” ko ‘ene me’á ia.

‘Ikai ko ia na’a ne pehē ai ‘oku ‘i ai e ngaahi makatu’unga ‘okú ne uesia e ngaahi sekitoa vaí pea ‘oku ‘ikai ke malava ha fonua ke ne hola mei ai.

“’Oku ‘i ai foki e ngaahi tefito’i ‘uhinga ‘oku ne fakatupunga e ngaahi liliu ki he ngaahi ma’u’anga vai fakamāmani lahi pea ‘oku kau ki ai tokolahi hotau kakai ‘a ia ‘oku kau ki ai ‘a e fe’unuaki ‘i he nofó, feliuliuaki ‘a e ‘eá, ngaahi liliu fakatekinolosiá, ‘ekonomika pehē ki ha ngaahi me’akehe. ‘A ia ‘e malava ai ke ne uesia e ngaahi fakalakalaka ‘i he ngaahi ma’u’anga vaí mo hono fakalelé ki he kaha’ú.

‘Oku fakahoko fakataha ‘i he fakataha ni pea mo e fakataha hono ua ‘a e Kau Minisitā ‘o e Pasifikí ‘oku nau tokangaekina ‘a e sekitoa vai ‘a ia ‘e toki fakaava ‘i he Falaité.

Na’e me’a ai ‘a Hon. ‘Akilisi Pohiva ki he mahu’inga ‘o e fakataha ko ia he te ne ‘omai ha faingamālie ki he ngaahi Potungaue ‘a e Pule’anga ‘i he Pasifikí ke nau siofi e ngaahi pole ‘oku ne uesia e ngaahi ma’u’anga vai ‘o e Pasifikí pea ke solova e ngaahi pole ko iá.

“’Oku mahu’inga ke nau mateuteu ki he ngaahi palopalema ko ia ‘o e vaí ‘o hangē ko e taimi la’ala’aá, si’isi’iange e ngaahi ma’u’anga vaí, tafea pea mo e feliuliuaki ‘a natulá.”

‘I he me’a talitali ‘a Hon. Poasi Tei ko e Minisitā ki he Ngaahi Pisinisi ‘a e Pule’angá na’á ne fakamanatu ki he kau fakafofonga ‘oku nau kau mai ki he fakatahá ‘a e mahu’inga e ngaahi fakalakalaka ki he vaí ke malava ‘e he kakaí ‘o ma’u ha vai ‘oku sai, falala’anga pea mo totongi faka’atu’i ‘i he taimi kotoa pē.

Na’a ne toe faka’ai’ai foki ‘a e kau ma’u fakatahá ke nau poupou’i e ngāue ‘oku fakahoko ‘e he PWWA.

“Ko e ngaahi pole ko ia na’e ma’u mei he ola ‘o e fakataha’anga ‘a e Kau Minisitaá ‘i he ta’u kuo’osí ‘oku fiema’u ia ke tau mu’omu’a ‘i hono poupou’i e ngaahi ngaue ma’ongo’onga ‘a e PWWA ke hokohoko atu ai pe he ko e sino ma’u’anga vai eni ki he ngaahi Fonua ‘o e Pasifikí. Pea ka tau fai ia ‘e malava ke fakalele mo fakahoko lelei hotau ngaahi fatongiá ki he kakaí.”

Na’e kau ‘i he ouau fakaavá ‘a hono foaki ha ngaahi me’a’ofa mei he ngaahi Fonua ‘o e Pasifikí ki Tongá ni koe’uhī ko e malava ke fakahoko mai ki ai e fakatahá ni.

Hili ‘a e ouau fakaava ‘o e fakataha’anga ni ‘i Fa’oneluá na’e hoko atu ‘a e kau fakafofonga ki he konga hono ua ‘a ia ko hono fakaava ‘e he ‘Eiki Tokoni Palēmiá ‘a e PWWA Expo na’e fakahoko ki he Holo Fakamanatu ‘o Kuini Saloté.