Malōlō tangata hiva mo tame’alea ‘iloa ko Bill Sevesi Featured
Bill Sevesi and His Islanders, 1958 (L-to-R: Trevor Edmondson, Bobby Wynyard, Malu Natapu, Richard Santos and Bill Sevesi
23 'Epeleli 2016. Kuo malōlō tangata hiva, tame’alea mo fa’u hiva ‘iloa ‘i he Pasifiki ko Bill Sevesi ‘a ia na’e toe ‘iloa pe ko Wilfred Jeffs ‘i Aokalani Nu’usila ‘i he ‘aho Tokonaki ko hono 23 ‘o ‘Epeleli 2016.
Na’e ‘iloa foki ‘a e tangata ni ko e “Godfather of the Pacific” pe koe tangata ‘oku ne tokangaekina pe fakatetu’a kiai ‘a e Pasifiki kae tautautefito ki he ‘e ne ohi ‘a e ngaahi hiva faka-Pasifiki ‘i he mala’e ‘o e mūsika.
Ko e malōlō ‘eni ‘a Bill Sevesi ‘i hono ta’u 92. Na’e fa’ele’i ‘a Bill Sevesi ‘i Nuku’alofa Tonga ‘i he ta’u 1923 pea ne toki hikifonua ai mo hono famili ki Nu’usila ‘i hono ta’u 9. Na’a ne hoko koe sōtia ‘i he Va’a Fakakautau ‘a Nu’usila ‘i he tau lahi ‘a mamani hono ua pea na’e kau ‘i he tau ‘i ‘Iulope kae peisi ‘i ‘Itali.
Na’e foki mai ‘a Sevesi ‘i he hili ‘a e tau ‘o fakakake ai pe hono taleniti ‘i he mūsika pea pea makehe atu hono taleniti ‘i he kitā sitila (Steel Guiter). Na’e ‘iloa ‘ene kau tame’a ko e 'Wilfred Jeffs and the Islanders' pea liliu mei ai ki he ‘Bill Sevesi and the Islanders’. ‘I he 1950 tupu, 1960 tupu, mo e 1970 tupu fu’u ‘iloa ‘a e tame’a ni ‘i Nu’usila mo e Pasifiki pea na’e ‘i ai ‘ene ngaahi ‘alapama na’e fakatokanga’i faka mamani lahi.
Na’e foaki kiate ia ‘a e metali fakalangilangi ‘a e Kuini Pilitānia (Queen’s Service Medal) ‘i he 1995 pea fakakau mo hono hingoa ki he lisi ‘o e kau tu’ukimu’a ‘i Nu’usila ‘i he mala’e mūsika (New Zealand Music Hall of Fame) ‘i he ta’u 2015.
‘Oku manatu lelei ka e tautautefito ki he to’u ‘oku motu’a ange ki he ngaahi hiva mo e taleniti ‘o e tangata ni ‘i he mala’e mūsika.
