Tu’unga ma’ulalo tanuhala ‘a e Pule’anga: Fiema’u ha kau ‘enisinia sivile pea palani fakalelei ^Featured

'Oku ‘ikai toe veiveiua ‘oku lau miliona ‘oku fakamole ‘e he Pule’anga ki he polokalama tanuhala pea koe pa’anga koia koe tukuhau ia ‘a e kakai ‘o e fonua.

Na’e lahi foki ‘a e laulea fekau’aki mo e polokalama ko’eni pea neongo na’e ‘ikai tuku mai ha tali mahino mei he Pule’anga pea lahi hono faka’ikai’i mo fūfū’i ‘a e ngaahi fakamatala pea ‘itengia ‘a e ngaahi tukuaki’i mei he papulika moe kakai ‘o e fonua ‘o tala koe lotokovi ka na’e iku pe ke hā māmālie mai koe mo’oni ‘a e ngaahi tukuaki’i ko’eni.

Ko e kakai na’e foaki kiate kinautolu ‘a e ngaahi konituleki tanuhala ‘oku fehu’ia honau tu’unga falala’anga neongo hono faka’ikai’i ‘e he Pule’anga ‘oku foaki kiate kinautolu ha ngaahi konituleki.

Ko e tipeiti lahi na’e hoko heni ‘i he fonua mo e mītia faka-sosiale pea ‘oku mahu’inga foki ke fakatokanga’i ‘a e loto ‘o e kakai pea tali ‘a e fakaanga he koe laumalie ia ‘o e temokalati mo e langafonua ‘i ha fonua sivilaise.

Kuo paasi ‘a e taimi koia pea koe polokalama tanuhala ‘eni kuo fakahoko pea ‘oku tau poupou kiai he ‘oku ‘ikai ha’atau toe fili ka ka ‘oku toe fakaloloma he koe ngaahi mo’oni’i me’a na’e fai ‘a e tokanga kiai ‘a e kau fakaanga kuo ma’anu hake ‘i ho’ata mai ‘a e ola ‘o e polokalama ko’eni ‘i hono kamata hake pe.

‘I he’ene pehe leva ‘oku ‘i ai ‘a e totonu ‘a e kakai ‘o e fonua kenau fehu’ia mo ‘ohake ‘enau hoha’a ki he tu’unga ta’efakafiemalie ‘oku fakahoko ‘aki ‘a polokalama tanuhala ko’eni pea ‘oku ‘ikai toe veiveiua kapau ‘e ‘ikai ke tokanga ‘a e Pule’anga ki he hoha’a ‘a e kakai ‘e iku hoko koe laku maka fai ki tahi ‘a hono fakamoleki noa’ia ‘a e kakava ‘o e kakai mo e fonua.

Kuo ‘osi fai hono matā tonu ‘a e konga ‘o e ngaahi tanuhala ‘oku fakahoko ‘o kau ai ‘a e vahenga ‘Utulau mo e ngaahi kolo ‘i he vahenga Vava’u 16 ‘i hono kamata ai ‘a e polokalama tanuhala ‘a e Pule’anga.

‘Oku mahino ‘oku ‘ikai palani, ‘ikai ha kau ‘enisinia sivile kenau tokanga’i pea ‘oku mahino ‘a e tu’unga ma’ulalo ‘oku ‘i ai ‘o fakahoa moha pa’anga lahi kuo vahe’i ‘e he Pule’anga ki he ngāue ko’eni.

Ko e tanuhala ‘i Vava’u kuo tafi’i ehe vai pea ‘oku mahino mai na’e ‘ikai ha palani fakatafe kimu’a pea fakahoko ‘a e ngaue he koe lau miliona ‘oku vahe’i kiai.

‘Oku ‘ikai koha me’a fo’ou ‘eni ia he koe founga tanuhala pe ‘eni ia kuo ‘osi fakahoko ‘e ‘Etuate Lavulavu ‘i he vahenga ni kimu’a pea koe lēsoni mahino ‘e ‘ikai toe kehe he koia kuo foaki kiai ‘e Pule’anga kene fakahoko ‘a e tanuhala ‘i Vava’u.

‘Oku tui ta’e toe veiveiua ‘a e kolomu ko’eni pea mo e faka’amu ke ‘osi ha ngaahi ta’u pea tau fakafoki ‘etau manatu ki he fakamatala ko’eni koe founga tanuhala pe ‘eni ‘e ngāue’aki pea fakamole kiai hotau kakava mo ‘etau tukuhau pea fakataumu'a faka-kemipeini pea ‘e ‘ikai toe makape ia mei he founga ‘oku lolotonga fakahoko ‘aki tukukehe ange ‘a e tu’unga ma’ulalo ‘oku ‘i ai.

Ko e me'a 'oku kamata hala 'e faka'osi hala pe.

Ko e ngaahi kautaha na’e foaki kiai ‘a e faingamalie kenau fakahoko ‘a e tanuhala ‘a e Pule’anga ‘o hange koe Kautaha ‘a Siosaia Moehau, Kautaha ‘a ‘Etuate Lavulavu mo e Kautaha ‘a e Island Dredging ‘oku fakalele ‘e he foha ‘o Lord Nuku ‘oku ‘ikai ha’anau taukei ‘e taha he ngāue pehe ni pea ‘oku te’eki ai ha’anau ngāue ‘i he tafa’aki ko’eni ‘e fakahoko ‘i Tonga ni ke hoko koha sīpinga moha makatu’unga ke foaki ai kiate kinautolu ke fakahoko ha ngāue lalahi mo pa’anga lahi pea fua ‘e he tukuhau ‘a e fonua mo e kakai.

‘Oku ‘ikai toe veiveiua koe fakapone ‘eni mo e faihala pea kuo kamata ‘asi hono ola ‘i hono tafe’i ‘a e tanuhala ‘a e Pule’anga ‘i Vava’u ‘e he ‘uha pea koe tanuhala ‘oku fakahoko ‘i ‘Utulau ‘oku fakatamulu pea koe mata’i ngāue ‘oku mahino hono ‘ikai palani pea ta’e fakapolofesinale.

‘Oku fehu’ia pe koe fiha nai ‘a e pa’anga kuo foaki ma’ae Palēmia mo’ene kau Minisitā ‘i hono foaki ‘a e ngaahi konituleki tanuhala ki he ngaahi kautaha ‘oku fehu’ia honau tu’unga falala’anga. 'Oua 'e loi mai ha taha 'oku ta'e foaki mo mono lalo tepile ha me'a'ofa ki he Palēmia mo'ene kau naite he ko mamani 'eni pea 'oku 'afio hifo 'a Sihova.

‘Ofa mai ‘o palani pea ‘omai ha kau ‘enisinia sivile ke nau fakahoko hono tokanga’i ‘a e ngāue pea ka ‘ikai pea tanu pe mo ngaohi ha hala ‘e taha pe ua pe tolu ‘oku ‘alu’i kae fakahoko ‘aki e lelei taha pea ke peseti ‘e 100% ‘o valitā, kepingi, side walk pea fakatafe/fakamanava mo ta'aki e maka motu'a kae tanu fo'ou pea ke look smart mo faka polofesinale'o hoa mo e laumiliona.

Kuo mahino ko e polokalama ni ko e laku maka fai ki moana pea ‘oku tu’umalie pe ‘a e ki’i tokosi’i ka koe ngaahi kaungāme’a mo e fanga pone ‘a e Pule’anga ka e faka’ofa pe ‘a kitaua Tonga.