Totonu ke hiki ngaahi naiti kalapu mei he Hala Taufa’ahau ^Featured

 ‘Etita,

‘Oku ‘oatu ‘eku tohi ni mo ‘eku ‘ohovale peau toe pango’ia ‘i he fakapitenga ‘a e ngaahi naiti kalapu moe nigaahi fale hulohula he Hala Taufa’ahau. ‘Oku ‘uhinga ‘eni ki he’enau tu’u hokohoko kamata mei mangafa Positi ‘Ofisi ‘o a’u mai ki he Pangike ANZ.

Ko au ‘oku ou nofo muli ka ‘oku ou ‘ohovale he fo’i fakalakalaka ko’eni pea kiate au ‘oku popula ‘a e kakai ‘o e Fonua tautautefito ki he po Falaite mo e Tokonaki. ‘Ikai ngata he fihi ‘a e hala ka koe tokolahi mo e kau konaa ‘oku nau tu’u matanga he ve’ehala pea fakapopula ki he kakai pea ‘oku ‘ikai lelei ‘a e ‘ata ‘o e fonua ‘oku ‘oatu ki he Tu’apule’anga tauatautefito ki he Takimamata.

‘Oku ‘ikai ngata ai ka ‘oku tala koe fonua lotu ka koe ‘ata ‘eni ‘oku ‘ikai fakalotu. ‘Oku ou fokotu’u atu ki he Pule’anga ke hiki ‘a e ngaahi fale ni kiha feitu’u ange kae ‘ata ‘a loto Nuku’alofa ki he tau’ataina ‘a e kakai.

‘Okui hoko foki ‘i muli ni ‘a e ‘i ai pe ‘a e ngaahi ‘elia pau ki he ngaahi naiti kalapu mo e paa.

‘Oku te manavasi’i he toe ‘eve’eva luelue atu ‘i loto Nuku’alofa he po’uli he ngaue ‘a e kau konaa pea ‘oku ‘ata fakamatatu’a ai ‘a e Hala taufa’ahau na’a tau anga maheni kiai 'i he kuohili.

Faka’apa’apa Atu,

‘Ofa ki Tonga
Senee