Ta’efiemalie ‘Etoni Afu founga ngāue ‘a e Pule’anga ki he’ene pisinisi Featured
'Etoni Afu
Nuku’alofa, 7 Sune 2016. Kuo fakahā ‘e ‘Etoni Afu ‘o Navutoka kae nofo Mangere ‘i Nu’usila ‘a ‘ene ta’efiemalie ki he founga ngāue ‘a e Pule’anga ‘oku fakahoko ki he’ene pisinisi ‘a ia ‘oku fakalele ‘i he Maketi Talamahu.
Ko ‘Etoni Afu foki ‘oku kau ia he tokotaha pisinisi ‘oku ne hū lahi taha mai ‘a e fua’i’akau hangē ko e ‘apele, moli, pea, kalepi, piisi mo e kalasi kehekehe ‘o e fua’i ‘akau mei Nu’usila ki Tonga ni.
Fakatatau ki he lau ‘a ‘Etoni ‘oku ta’efiemalie lahi he ‘oku mahino mei he fakamatala kuo ‘oange kiate ia ‘e he kau ‘ofisa mei he Potungāue Fefakatau’aki ko ‘ene pisinisi, Kautaha Molisi mo e Kautaha Siaina ‘i Fasi mo e Afi kuo nau ‘osi lesisita mo laiseni kenau hū mai ‘a e fua’i’akau ki Tonga ni mo fakahoko ‘a e pisinisi natula tatau.
‘I he taimi tatau ‘oku nau totongi ‘a e pa’anga lahi ki he Potungāue Kasitomu ‘i he CT ka ‘oku ne ongo’i ‘oku ‘i ai ‘a e ni’ihi ‘oku nau fakahoko ‘a e pisinisi tatau mo kinautolu ka ‘oku ‘ikai maau ‘a ‘enau ngāue fakapepa pea ‘oku ne tui fakapapau ‘oku ‘ikai kenau totongi ha pa’anga lahi ‘i he CT he ‘oku ‘ikai mahino ‘enau ngaahi ‘inivoisi ‘oku ngaue’aki pea ta’emahino foki.
‘Oku ongo’i lahi foki ‘eni ‘e ‘Etoni ‘o fakatatau ki he’ene fakamatala he ‘oku mark-up tatau pe ‘a e totongi ‘o ‘ene fua’i ‘akau mo kinautolu ka ‘oku ne ‘ilo pau ‘oku ‘ikai kenau fou ‘i he founga totonu. Na’a ne toe fakahā foki kuo fakamatala tonu ange kiate ia ‘e he kau ‘ofisa mei he Potungāue Fefakatau’aki ‘oku ‘ikai ha pepa ‘a e kakai koia pea ‘oku ne tui ta’e toe veiveiua ‘oku ‘ikai palanisi ‘a e founga pisinisi he ‘oku fou ia he founga pea ne fua mo hono kavenga fakapa’anga ka e tukuange ‘a e ni’ihi ia ke fa’ifa’iteliha pe.
‘I he fakamatala ‘a ‘Etoni ‘oku ne tukuaki’i ‘a e ‘ikai maau ‘a e founga ngāue ‘a e Pule’anga ki he ngaahi pisinisi ko’eni ‘o kau ai ‘a e fa’ahinga pisinisi ‘oku ne fakahoko he ko e ta’u lahi ‘eni mo e kei palopalema pe. “’Oku fakaholomui ‘aupito ‘eni kiate au pea ko hono mo’oni ‘oku ma’u ‘eku mo’ui he fa’ahinga pisinisi ko’eni ‘oku ou fakahoko pea taimi tatau ‘oku tanaki tukuhau mei ai ‘a e Pule’anga ‘o lelei ki he ‘ikonomika ‘o e fonua”, ko e konga ia ‘o e fakamatala ‘a ‘Etoni.
‘Oku hū mai foki ‘e ‘Etoni Afu ‘a e meimei koniteina fua’i’akau ‘e 2 he uike kotoa tukukehe ange ‘a e ngaahi taimi konifelenisi mo e ngaahi katoanga lalahi ‘a ia ‘oku toe lahi ange ia. ‘I he taimi tatau ‘oku mahino ki he ongoongo ni ‘a e manakoa ‘a e pisinisi ko’eni ‘a ‘Etoni he kuo lau ta’u ‘a e ‘ene fakahoko ‘a e ngāue ni.
Na’e ‘oatu foki ‘e he ongoongo ni ‘i he mahina ko Fepueli ‘o e ta’u ni ‘a hono faka’ikai’i mamafa ‘e ‘Etoni Afu ‘a e tukuaki’i ‘e he Fale Alea ‘oku ‘ikai ke tute hono hū mai ‘a e fua’i ‘akau kae kei mamafa pe hono fakatau atu ki he kau kasitoma mo e kakai 'o e fonua. Na'e fakamahino foki ‘e ‘Etoni neongo ‘oku to’o ‘a e tute ka ‘oku nau kei totongi pe ‘a e CT ‘a ia ‘oku ‘avalisi ki he TOP $6000 ki he koniteina pea ko e pa’anga lahi ‘a e fonua ‘oku tanaki mei ai.
‘Oku faka’amu foki ‘a ‘Etoni ke fakalelei’i ‘e he Pule’anga ‘ene fakahoko fatongia fekau’aki mo’ene ta’efiemalie pea kenau fengāue’aki fakataha tautautefito ki he Potungāue Kasitomu mo e Potungāue Fefakatau’aki he ‘oku fua ‘e he ni’ihi ‘oku muimui ki he lao ‘a e kavenga fakapa’anga ‘o e fa’ahinga pisinisi ko’eni ka e ‘ai’ainoa’ia ‘a e ni’ihi pea nau toe fakatau atu pe he totongi tatau.
“‘Oku ‘ikai keu tui koha launga ‘eni pe tukuhifo ka ko ‘eku fakahoko ‘a e fatongia totonu mo ‘oatu ‘eku hoha’a ki he kau ma’u mafai fekau’aki mo e tafa’aki ‘oku totonu ke fakalelei’i he 'e lelei kia kimautolu matu'a 'oku ngaue he tafa'aki ko'eni, Pule'anga mo e fakalukufua ‘a e fonua", ko e faka'osi mai ia 'a 'Etoni.
10 comments
-
Malo mu'a 'ae ngaue lelei moe ngaue Lahi hono fai 'ae ngaue ko'eni, ko hono hu mai 'ae Fua'iaku/Fruits moe Vegetables ki hotau Maketi Fklotofonua, koe ta'u kuo 'osi na'e ongona mai 'ae holoki 'ae Tute/Duty kihe koloa ko'eni, 'ihe taumu'a pe 'e taha ke ma'ama'a. ke malava 'e Tonga 'o kumi ha'ane fo'i Fruits he 'oku kaunga tonu ia kihe Moui Lelei 'ae Sino........
Koe tu'unga 'oku mo 'iai he 'aho ni 'oku fu'u to atu 'ae Langa pisinisi ia fktatau kihe fika 'oe koniteina 'oku mo hu mai (average he container 'e 48- 50 tupu he ta'u) pea mahino mai hono fiema'u 'ae Fruits n Vegetables 'ehe Kakai Tonga.
Koe fokotu'u atu,
1. 'Oku 'ikai ke tapu ke fkhu ha'amo launga kihe Minister of Custom kihe me'a 'oku mo loto mamahi ai ?
2. Koe totongi CT hange kiate au 'oku fika'i ia he mahu'inga 'oe koloa 'oku mo hu mai. fikai ia he pa'anga NZ.(fktonutonu mai).
3.'Oku mo mo'oni he kau Black Market, pea ko kinautolu 'oku hu Lalo uaea holo mo ta'emuimui kihe tu'utu'u ni 'ae Lao. pea fktonga'i 'oku 'ikai lesisita pisinisi mo Totongi Tax kihe Pule'anga.
4.Mo loto Lahi 'o fai ho'omo lelei taha he langa ngaue 'oku mo fkhoko pea 'oua 'e fiu ngofua he kuo pau ketau fou he ngFaingata'a Lahi pea tau toki 'IKUNA....... -
Malo e ngaue 'Etoni pea malo e lototo'a keke fakaha ho'o fiema'u he koe fonua temokalati 'oku pehe. 'Oku ou tui 'oku 'ikai koha ngaue faingofua 'oku ke fakahoko pea 'oku mahino pe ho'o fiema'u ke muimui e founga ngaue ki he lao. Poupou atu mo e talamonu ki he ngaue pea malo ia ho'o hu mai ke holo hifo ai e totongi e fuluti mo tokoni kia mautolu masiva.
-
Melle Afu koe faahinga laumalie ena oku fiemau kihe langa hotau fonua ni. Heikai ketau tautu ai pe o fakaanga mo mamahi. Kou kole kemo lau e pole kotoa koe tapuaki. Ko hotau fanga kii ahiahi oku ikai lahi ihe ahiahi nae fou ai hotau fakamoui. Ofa atu moe lotu pea moe fakamonu kihe ngaue na.
-
Oku ma fkmalo lahi atu moe loto houngaia mooni ihe ngaahi poupou oku mou omai, ihe lolotonga ni oku lolotonga lele sauté pe ae onioni, pateta hange koe apele moe kaloti o fktatau moe mark up oku omai meihe Potungaue Fefakatauaki, oku ma sio ki hano toe holoki moe mahuinga oe kalepi kihe katoanga a Toloa, aia koe lele koeni heikai ke toe iai ha mea e nounou , oku ma tukupa e fkhoko e lelei taha ke lelei kihe kakai oe fonua . Malo moe loto houngaia mooni.
-
Sai pe ko loholoho ena na'a tokoni atu mo ha ngaahi fakakaukau lelei ke ta'ofi ha toe fe'au'auhi mo koe he 'oku ke faitotonu koe ia e.
-
'Ai koe 'Etoni ke fa'iteliha keke lea tala ho loto pea ngali 'e lele saute 'etau fruit he 'aho 'o toloa ee. Ioooooo.....................
-
Kou peheni eau kuo taofi hoo pisinisi i Tonga ni. Ave kihe Fkamaauanga e ngaahi ngauehala oku ke osi fakapapaui. Pea ke lau e ngaahi fakafeatungia koena koe fakalahi ivi ia kiate koe. Teke tolonga koe okapau oku ke faitotonu. Ofa atu moe lotu.
-
''Oku 'iai e mo'oni lahi heni 'a 'Etoni Afu he 'oku nau si'i feinga kenau mo'ui mo tokoni mai ki Tonga ni. 'Ofa pe 'e fakapotopoto e pule'anga pea fai ha ngaue ki he hoha'a 'a Afu.
-
Ko e me'a lelei 'eni ke fakahaa kae fai leva ha ngaue fakalukufua ki aii. Malo
-
Poupou atu ki he matapule ko'eni mo hono fakaha hono le'o. 'Oku tau tui ke 'oua tetau maa pe toe ngaue'aki ha 'uhinga kehe ka tau lea 'aki hotau loto mo tala 'etau hoha'a. Ko e pisinisi 'eni 'oku 'iloa 'i Tonga ni pea tokoni lahi ki he kakai he taimi konifelenisi.