Hopoki Fale Tuku'anga Faito'o 'a e Potungāue Mo'ui
11 Fepueli 2024. Na'e hopoki 'e he Tama Pilinisi Kalauni Tupou To'a 'Ulukalala 'a e Fale Tuku'anga Faito'o 'a e Potungaue Mo'ui 'i Veitonga 'i he 'aho Tu'apuelulu 8 Fepueli pea na'e me'a ai 'a e kau fakaafe tokolahi.
Ko e fale foki ko'eni koe fakapa'anga 'e he Pule'anga Nu'usila pea na'e me'a tonu he katoanga ni 'a e Tokoni Palēmia 'o Nu'usila Hon. Winston Peters pehe ki he'enau Minisitā Mo'ui mo e Minisitā ki he Kakai 'o e Pasifiki Hon. Dr Shane Reti.
Ko e konga foki 'eni 'a e polokalama tokoni 'a Nu'usila ki he mo'ui pea na'e fakatupunga 'eni 'i he hoko mai 'a e mahaki faka'auha Koviti-19 ki Tonga ni 'o pau ai ke siofi ha Fale Tuku'anga Faito'o tene feau 'a e fiema'u fakafaito'o 'a e fonua 'i he taimi 'e hoko ai ha fakatamaki fakaenatula pe koha fakatamaki ange pe.
'I he fakamatala 'a Leva'ita'i 'Asaeli 'a ia koe 'ulu ia ki he tafa'aki fakafaito'o (Head Pharmacist) 'a e Potungaue Mo'ui 'a Tonga ki he ngaahi kautaha ongoongo koe tokoni ma'ongo'onga 'eni pea 'oku fiema'u foki moha kau ngāue he tafa'aki ni.
Na'e fakamalo'ia 'e he Tokoni Palēmia 'a Tonga ka koe Palēmia Le'ole'o ia Hon. Samiu Kiuta Vaipulu 'a e tokoni ko'eni 'a Nu'usila ki he fonua pehe ki he va fengau'aki 'a e ongo fonua 'i he mala'e 'o e mo'ui.
'I he me'a 'a e Tokoni Palēmia 'a Nu'usila Hon. Winston Peters na'a ne fakamamafa 'a e fiema'u ke fai tokonia 'a Tonga 'i he fakalakalaka 'i he fengāue'aki vaofi mo Nu'usila pea 'oku poupou kakato 'a Nu'usila ki he fa'unga Pule'anga 'o Tonga.
