Faka’atā ta’u 35 ki ‘olunga ke kau ki he huhu malu'i Covid-19 Featured
29 ‘Epeleli, 2021. Kuo faka’atā ‘e he Potungāue Mo’uí ‘a kinautolu ‘oku nau ta’u 35 ki ‘olunga pea mo kinautolu ‘oku nau ta’u 18 ki ‘olunga ka ‘oku ‘i ai honau mahaki tauhi mo e faingatā’ia fakaesino (person with disabilities) ke nau kau ki he Polokalama Huhu Malu’i KŌVITI-19.
Kimu’a pea fakahoko ‘a e ‘uluaki takai ‘o e polokalamá na’e sivi’i ai ‘e he potungāue ‘a e lahi ‘o e faito’o huhu malu’í pea na’e ngali ‘e ta’e’aonga ‘a e peseti ‘e 10-15 ‘o e faito’ó. Lolotonga ‘a e lele ‘a e ‘uluaki takai ‘o e huhu malu’í na’e vakai’i ai ‘e he potungāué ‘a e tu’unga ‘oku ‘i ai ‘a e polokalamá pea na’e mahino ai ‘oku te’eki ai ke ‘i ai ha faito’o ia ‘e ta’e’aonga.
‘I he’ene pehē tupunga mei he kei toe lahi ‘a e faito’ó ‘oku tuku hifo leva ‘a e ta’u motu’á ke fakafaingamālie’i ‘a e kakai ‘o e fonuá kenau kau atu ki he polokalamá.
‘I he’ene a’u mai ki he ‘ahó ni 29 ‘o ‘Epelelí, ‘oku fe’unga fakakātoa mo e toko 8,220 ‘a e tokolahi ‘o kinautolu kuo kau ki he ‘uluaki takai ‘o e Polokalama Huhu Malu’i KŌVITI-19, pea ‘oku faka’avalisi ki he toko 724 ‘a e tokolahi ‘o e kakai ‘oku nau kau faka’aho atu ki he polokalamá.
Ko e pēseti ‘eni ‘e 40% ‘o e faito’ó kuo ’osi ngāue’akí hili hono luva atu ‘i he ‘aho 15 ‘o e mahiná ni.
Taimi tatau, ‘oku fe’unga he taimi ni mo e toko 9,484 ‘o kinautolu kuo’osi lesisita ki he Polokalama Huhu Malu’i.
