Fili 'a Viliami Taufa ke hoko ko e fale'i ki he Palemia.
Kuo ma’u ‘a e fakaha mei he ‘Ofisi ‘o e Palemia kuo fili ‘a Viliami Taufa kene hoko koe fale’i ki he ‘Eiki Palemia ’o Tonga. Ko hono fili ‘eni ‘o Viliami Taufa lolotonga ‘oku ne fakahoko fatongia koe tangata fakatotolo ‘i he kautaha Dairy NZ ‘a ia ‘oku nau fakamamafa ki hono fakahoko ‘a e ngaahi fakatotolo ki he faama pulu mo e hu’akau moe ngaahi me’a kehe pe fekau’aki moe ngoue pea ‘oku ne fakahoko fatongia mei Waikato.
‘Oku ‘i ai foki ‘a e ‘amanaki ‘e ‘aonga ‘a e taukei ‘a e tokotaha ni he tafa’aki ko’eni kene tokoni ai ki he sekitoa ngoue ‘a e fonua ‘a ia ‘oku fiema’u ke fakakake. Ko Viliami Taufa foki koe memipa ia ‘o e Paati ‘Otu Motu Anga’ofa (PTOA) pea koe tangata na’e tohi kolomu (Columnist) ma’a Nusipepa Kele’a.
Ko e lakanga fale’i ki he Palemia na’e kamata mai ‘i he Pule’anga ‘o Feleti Sevele pea na’e fakangata pe hili ‘a e ta’u ‘e taha moe konga ‘a e fakahoko fatongia ‘a e Pule’anga ‘o Tu’ivakano makatu’unga ‘i he teke mei tu’a tautautefito ki he Fa’ahi Fakaanga ‘o e ‘aho koia ke fakangata ‘a e lakanga ni kae ngaue’aki pe ‘a e Kapineti mo e kau CEO ‘a e ngaahi Potungaue.
Oku te’eki e mahino ha taimi ‘e tu’uta ai ‘a Viliami Taufa mo hono famili ‘i Tonga ni ke kamata ‘i hono lakanga fo’ou.
