Fakafisi 'a Vuna Faka'otusia mei he Kapineti Featured
Vuna Faka'otusia
14 Tisema, 2020. Kuo fakafisi 'a e Tokoni Palēmia Vuna Faka'otusia mei he Kapineti hili ia ha'ane fakamo'oni 'i ha fokotu'u fili fakahā loto ke fakahifo (Vote of No Confidence) 'a e Palēmia na'e fakahū ki he Fale Alea 'i he uike kuo 'osi.
'Oku ma'u 'e he ongoongo ni ha fakamatala falala'anga na'e fekau'i 'a Vuna 'i he faka'osinga 'o e uike ke fakahū mai 'ene tohi fakafisi pea na'a ne fakahoko pe 'eni 'i he loto hangamalie.
'Oku lolotonga tapuni foki 'a e Fale Alea 'o fakaangaanga ke toki fakaava ki he mahina ko Sanuali 2021 ka 'oku mahino mai 'oku hoko 'a e fokotu'u fili fakahā loto ke fakahifo 'a e Palēmia kene 'omai 'a e 'ata kehe ki he tu'unga faka-politikale 'o e fonua.
'Oku takimu'a foki 'a Semisi Sika 'a ia koe Tokoni Palēmia malōlō ia mei he Pule'anga 'o 'Akilisi Pohiva 'i he fokotu'u fili fakahā loto ke fakahifo 'a e Palēmia pea 'oku mahino kuo nau fakapapau'i mai kuo nau ma'u 'a e kau memipa 'e toko 10.
'I he tu'u leva koia kuopau kenau ma'u 'a e fo'i fili 'e 13 pea toki malava 'a 'enau taumu'a ke tukuhifo 'a e Palēmia makatu'unga 'i he 'uhinga ko e tokotaha 'o e Hou'eki Memipa 'oku ne lolotonga 'i muli.
Ko e ngaahi makatu'unga 'e 7 na'e fakahū mai ki he Fale Alea 'oku 'uhinga ai 'a e fokotu'u fili fakahā loto ke fakahifo 'a e Palēmia pea 'oku tefito pe he ta'efiemalie ki he founga hono fakalele 'o e Pule'anga.
ā
