Tonu ke fakamu’omu’a ‘a e Tohi Tangi ‘a e Kakai ‘i he to’u Fale Alea ko’eni Featured
Ko e Sea Fale Alea Lord Fakafanua, Fakafofonga 'Eua Tevita Lavemaau mo e ni'ihi na'a nau fakahu atu 'a e Tohi Tangi ki he Fale Alea 'o Tonga
Lau 'a e 'Etita
Tonu ke fakamu’omu’a ‘a e Tohi Tangi ‘a e Kakai ‘i he to’u Fale Alea ko’eni
Na’e ‘oatu pe foki ‘i he ongoongo ni ‘a e hoha’a lahi ki he lahi ange hono tapuni ‘o e Fale Alea ‘o Tonga ‘i he ngaahi aho ni mo e ‘ikai ke ho’ata mai ‘oku ngaue ‘a e Sea ‘o e Fale Alea ke fakahoko ha ngaue ki he me’a ni.
‘Oku totonu ke mahino ki he Hou’eiki Memipa kuo fili ki he Fale Alea ‘o Tonga koe Fale Alea koe ngaahi pou tuliki ia ‘o ‘etau temokalati pea ko e feitu’u totonu mo taau ia ‘oku ‘oatu kiai ‘a e si’i le’o ‘o e kakai masiva ‘o e fonua.
‘Oku mahino mei he Fale Alea ‘o Tonga ‘e lele ‘a e Fale ‘i he ‘aho Monite 17 ‘o Sepitema pea kuo ma’u mo e fakamatatala mei he ni’ihi ‘o e Hou’eiki Memipa kuo ‘osi tufa mai mo e ngaahi Lao Fakaangaanga ‘a e Pule’anga ‘o kau ki hono fakatonutonu ‘a e Konisitutone ‘o e fonua, Fakatonutonu ki he Lao Polisi, Fakatonutonu ki he Lao ki he ‘Omipatimeni mo e ngaahi Lao Fakaangaanga ‘oku laka hake ‘i he 10.
‘Oku fakaloloma he ‘oku ‘ikai ke ‘i ai ha lau ia heni ki he ngaahi tohi tangi kuo fakahu atu ‘e he ni’ihi ‘o e kakai ‘o e fonua ki he Fale Alea ‘o Tonga.‘Oku totonu ke fakamu’omu’a ‘e he Sea ‘o e Fale Alea ‘a e ngaahi tohi tangi ‘a e kakai ‘i he ‘asenita ‘a e Fale Alea pea toki muimui mai ‘a e ngaahi Lao Fakangaanga ko’eni ‘oku fakataumu’a ke to’o ‘a e ngaahi mafai lolotonga ia ‘oku ‘ikai ha’ane uesia ki he fonua.
‘Oku lolotonga uesia ‘a e fonua ia ‘i he ngaahi ‘aho ni ‘i he faihala mo e ngaahi ngaue ta’efakalao ‘a e kau taki ‘a ia na’e ‘oatu ‘i he kakano ‘o e tohi tangi ‘a e ni’ihi ‘o e kakai ki he Fale Alea.
Ko e temokalati ko e pule ‘a e kakai pea ‘oku totonu ke fakamu’omu’a ‘a e le’o ‘o e kakai mo ‘enau tangi fekau’aki mo e ngaahi kaveinga ‘oku kaungatonu ki he’enau mo’ui mo hono tataki kinautolu.
Kapau ‘e ‘ikai ke fakahoko hano alea’i ‘o e tohi tangi ko’eni fekau’aki mo e Palemia mo e ni’ihi ‘o e kau Minisita ‘o e Kapineti pea ‘oku mahino mai leva ‘a e tukunga ‘oku ‘i ai ‘etau temokalati ‘a ia kuo a’u ia ki he tu’unga ‘oku totonu ketau fakalea ‘o pehe kuo ne si’i pekia pea ‘oku totonu a ke telio leva na'a 'i ai hano anga..
Na’e ‘osi fanongo pe ‘a e ni’ihi ‘o e kakai ‘o e fonua ki hono lau ‘enau tohi tangi ‘i he ngaahi mahina kuo tau situ’a kiai pehe ki hono tukulalo’i ‘e he Palemia mo e ni’ihi ‘o e kau Minisita ‘a e si’i tangi ko’eni ‘a e kakai ‘o e fonua pea nau pehe ‘oku ‘ikai ke fai ha hoha’a kiai he ‘oku maumau taimi pea ‘ikai ke mo’oni ‘a e kakano ‘o e tohi tangi.
Kapau leva ‘oku ‘ikai ke mo’oni pea ‘oku tonu pe ‘a e Palemia mo ‘ene kau Minisita pea koe fehu’i ‘oku muimui mai ai pe koe ha leva ‘oku nau manavahee ai ke ‘asenita’i ‘i he Fale Alea? ke fai hano tipeiti’i mo hano alea’i mo ‘omai ha’anau tali pea ke me’a kiai ‘a Hou’eiki pea fanongo atu kiai ‘a e kakai ‘o e fonua.
Ko e me’a ia ‘oku ui koe temokalati mo e taliui ki he kakai pehe ki he ‘ata ki tu’a ka e ‘oua ‘e toki ui pe koe Pule’anga ‘o e kakai ‘i he teu fili Fale Alea.
‘Oku tau ‘amanaki pe ‘e fakahoko ‘a e ‘amanaki ‘a e ni’ihi ‘o e kakai na’a nau fakahoko ‘a e tohi tangi pea ‘oku toe fakamanatu atu pe heni koe tohi tangi koe totonu faka-Konisitutone ‘oku ‘omai ‘e he Konisitutone ‘o e Pule’anga faka-Temokalati ko Tonga ki hono kakai ke ‘ave honau le’o ki he Fale Alea ‘o Tonga kapau ‘oku ‘i ai ha kaveinga ‘oku nau tokanga kiai pe koha ngaue ‘a e kau taki ‘oku ‘ikai ke hohoa tatau mo e ‘amanaki ‘a e fonua mo hono kakai.
‘Oku mole ke mama’o hano tukuaki’i ‘o e Sea pehe ki he Fale Alea ‘o Tonga mo hono Hou’eiki Memipa ka koe fakamanatu atu pe ‘a e fatongia totonu ‘o e Fale ‘Eiki ke fakahoko ki he fonua.
