Na’e ‘i ai ‘a e ngaahi sipoti na’a tau fu’u lelei ai ^Featured

‘Oku ‘ikai fa’a laua ‘a e ngaahi sipoti ‘oku kau ki he fe’auhi pea ‘oku malava foki ke tala ‘a e ngaahi sipoti ‘oku malohi mo fakahoko lelei ‘e he ngaahi matakali mo e ngaahi fonua ‘o fakatatau ki he tu’u faka-siokālafi ‘o mamani.

‘Oku ‘ikai ke lau ki heni ‘a e ngaahi moe fa’ahinga sipoti ‘oku tukufakaholo ‘a e lelei ai ‘a e ngaahi fonua ‘e ni’ihi ‘i mamani ‘o hange ko hono fai ‘e Cuba e fuhu, fakahoko ‘e Kenya mo e ngaahi fonua ‘Afilika ‘a e lele loloa, Pasiketipolo mo e kakau hono fakahoko ‘e ‘Amelika, Gymastics hono fakahoko ‘e he ngaahi fonua Hahake ‘o ‘Iulope mo ‘Esia mo e hā fua.

‘Oku tau fakamālō’ia ‘a e tokoni ‘a e Pule’anga Tonga mo e kau siponisoa ‘o malava ke ‘ave ‘etau timi ki he fe’auhi ni pea neongo ‘oku tokosi’i ka ‘oku tau kau he lau pea tau lau he kau.

‘I he taimi tatau kuo falahoko ‘e he foha ‘o e fonua ko Pita Taufatofua ‘a e me’a malie ‘o ‘ilo lahia ai ‘a Tonga ‘i he Kolope pea ‘oku ‘ikai ketau toe veiveiua ko e tumu’aki ia ‘o ‘etau kau atu ki he sipoti koe hoko ‘etau fanau ko e kau ‘Amipasitoa lelei ki hono tu’uaki ‘o e fonua.

Kaikehe ko e timi ‘a Tonga ki he sipoti ‘i Rio ‘oku kau ai ‘a e fana ngahau, kakau, mo e taekwando tukukehe ange ‘a e sipoti lele. ‘Oku fo’ou foki ‘a e ngaahi sipoti ni ki Tonga ni neongo ‘oku ‘ikai hano maumau pea ko e fakalakalaka ia kuo hoko ki he taleniti ‘etau fanau ka ‘oku ‘i ai ‘a e ngaahi sipoti ‘oku ‘ikai ketau toe malava ke kau atu kiai ‘i he fe’auhi ni ka ‘oku tau fu’u lelei ai pea hoa mo e fa’unga faka-fisikale ‘o ‘etau fanau.

Ko e fakatātā lelei taha kiai ko e sipoti fuhu pea na’a tau ‘osi a’u ai ki he tumutumu ‘i he Sipoti ‘Olimipiki ‘aki ‘etau ikuna ‘a e metali siliva ‘i Atlanta ‘i ‘Amelika ‘i he ta’u 1996 ‘i he mala’e ni. Ko e faiva ‘akapulu ‘oku hoko ko e sipoti faka-fonua ‘i Tonga ni ka ‘oku mahino pe ‘oku ‘ikai ketau kualifai ki ai.

Ko e sipoti tolo ‘oku ‘i ai ‘a e tui tetau lelei ai pea kuo hoko ‘a Valerie Adams ko e fefine Tonga ‘oku ne fakafofonga’i ‘a Nu’usila ko e sipinga ia ki he ivi mo e taleniti ‘o e Tonga he mala’e ni.

‘Oku tau fakamālō’ia foki ‘a e ngāue tōtōivi ‘a kinautolu ‘oku nau mateaki hono langa hake ‘a e sipoti ‘i Tonga ni hangē ko e TASANOC mo e ngaahi ‘Apiako pehē ki he ngaahi Kumiunitī ka ‘oku langa e manatu ki he ngaahi sipoti na’e ‘ilonga ai hotau matakali pea ‘oku kei fiema’u pe ke toe fakakake.

Mana hena 2019.