Fisi 'o e Leilani ^Featured

1. Si‘oto tu‘a‘ofa ‘i he fisi ‘o e leilaní
He kakala mahu‘inga taha pē koe ‘i mamaní
He ko e sino ni ia kuo li‘akí
Ko e ‘uli mo e efu au ‘oku ke malakí

2. Ta‘ahine ha‘u mu‘a ke ta pōtatalá
‘I he malumalu ‘o ‘eku ngoue kakalá
Ka u foaki atu mo u fakamatalá
Si‘eku ‘ofa haohaoa ‘i ho ‘anga‘angá

Tau:
'Oku hangē ko e kilukilua ‘o e ‘atā
Mo e loloto ‘o e ‘ōseni moaná
‘A e misiteli ‘o e ‘elemeniti ‘o natulá
‘Oku pehē tofu pē nai ‘a si‘ete ‘ofá

KO E KI‘I FAKAMATALA NOUNOU

‘Oku tatau nai mo e hā ‘a e fiefia mo tuha ‘apē mo e hā ‘a e māfana ko ‘ete lave ki he momona ‘o e faiva ta‘anga hiva kakala ko e “Fisi ‘o e Leilani,” ‘a ia na‘e fakafatu/fakafa‘u mo fakaafo/fakafasi ‘e he pulotu fa‘u/pulotu hiva/punake, Siale Sanft, ‘o tefito he‘ene ngāue‘aki lahi ‘a e heliaki fakafetongiaki, ‘o tukukehe ange ‘a e mohu mo ‘ene hohoatatau mo hono afo/fasi /melotí, ‘a ia ‘oku kehe ‘a e afo/fasi ‘o e ongo kupu/veesi ‘uluaki [1] mo e ua [2] mei he tau/kōlesi.

‘Oku ngāue‘aki lelei ‘e Siale ‘a e fo’ilea Tonga ohi ‘e nima [5] mei he lea ‘Ingilisi ko e heliaki fakafetongiaki ki hono ‘ofa‘anga, ‘a ia ‘oku tatau ‘a e lahi vavale ‘ene ‘ofa mo e misiteli ‘a e ma‘olunga ‘o e ‘atā he vavā/langi ‘i ‘olunga mo e loloto ‘o e ‘ōseni moana ‘i mamani ‘i lalo. ‘Oku to e faka‘ofa fau si‘ene ‘ofa faivavale he‘ene viki mo sani hono ‘ofa‘anga – ‘a e kakala ko e leilaní – ‘o ne lauvavake si‘ene li‘ekina mo ‘ene hoko ko e ‘uli mo e efu pē ‘oku ne malakí.

Fai ‘e Palōfesa Hūfanga Dr ‘Ōkusitino Māhina
Professor of Art, Culture and Critical Anthropology
Vava‘u Academy for Critical Inquiry and Applied Research [VACIAR] &
Tonga International Academy [TIA]