“TĀHĀSĀ: Ki he Lelei Taha” ^Featured

FATU ‘E DR HELU [SIOSAIA LANGITOTO HELU]
KATOANGA FAKAMANATU ‘AE TA’U 65 ‘O E TONGA HIGH SCHOOL (THS), 2012

1. TE U HŪFANGA HE FAKATALUTALÚ
MO E TALAFATU ‘OKU TOPUTAPÚ
NA’E TUKU’AU TALU MEI A LO’AÚ
KA U HAAKAHAKA MO LAUKAÚ
MO PAATAPATA HE LANGI KUO TAÚ
 HE ‘AHO ‘OKU TA FAKAMANATÚ

2. KO SI’OTA NGAFA Ē KUO PAVAKÍ
MO E FATONGIA KUO TALAKÍ
THS Ē KE TA MA’ALALÍ
ONONIMA TA’U KUO HOKOSÍ
KEINA ‘I PĀ LELEI ‘A E TOUTAÍ
OLA ‘O E SIU ‘A E LULUTAÍ

3. FĀFITU TĀVĀ ‘E NGALO ‘AFĒ?
KALOFIAMA MOFISI HE PILIOTÉ
TAPA HONO HUELO HE KOLOPÉ
HULUNGIA ‘A TONGA FULIPÉ
 ONGO KI HE LOTO PEA MALAVÉ
KUO MĀLIE ‘A E HIKIFOHÉ

4. KI HE LELEI TAHA SI’ETA MOTÓ
LĪPINE KOULA SI‘ETA LOKÓ
MALUNI KO E TAI Ē OKÓ
PUKEA Ē MAMANI TAPOTÓ
KO E AMALOA HULUNI HE PÓ
FUNGANI Ē ‘ILO MO E POTÓ

5. MA’U PĒ NOFO ‘A E MATANGÁ
MAFITĀE’ULUAFI KE TAKI TUÁ
TULIKI TATAU ‘O E HALA TAUFÁ
MO E TU’U ‘A MALA’E KULÁ
KE TULOU MO E FU’U HEILLALÁ
MO E UASI MATAFĀ KO E FUÁ

6. FOU ATU HE FALE FAKAMANATÚ
KUINI SĀLOTE ‘OFEINA FAÚ
KO E FAKAMA’UNGA Ē ‘ĀNAÚ
SI’I LALO KĀSIA MO E PAINI MUTÚ
AKE ‘A E MANATU ‘O FAKAUTUUTÚ
FA’AKI Ē MATANGI PEA ALAMUHÚ

7. HIKI HĀ TUĒ NUA MO TELE’Á
PĀ MAVAVA SANGONE MO KAVÁ
HUA MAI HA LANGI TAU’OLUNGÁ
KA E FOLAHAKA Ē TAHAHIVAONOFÁ
‘UTEIFUIONO PE’I KE TEKIFAIVÁ
TAPU KE ‘EKE PĒ VETE ‘E TAHÁ

“‘Ilo Moe Poto ‘Eta Motó”

Fatu ‘e Palōfesa Hūfanga Dr ‘Ōkusitino Māhina
Katoanga Fakamanatu ‘ae Ta’u 68 ‘oe Tonga Hai Sikulu (TāHāSā), 2015

Tulou moe uasi fofongafā
Tala‘anga ‘oe tā mo e vā
Kei ‘a‘ala ‘ae fu‘u heilalá
Ne fakaili he faa‘ikuongá

1.    Poutaha koe tala fakatapú
    Hoto fatongia fakatalutalú
    ‘Ene tuku‘au meihe fāfitú
    ‘O tu‘ula he onovalu ē ta‘ú

2.    Pouua si‘eta tō‘ongapō
    Fuomoeuho ē ‘ilo moe potó
    Kihe-Lelei-Taha ‘eta motó
    ‘Ae TāHāSā he ‘ikai ngaló

3.    Poutolu koe faka‘ānaú
    Loto to‘a koe feilaulaú
    Tohi loto ‘ihe manatú
    Tongi tu‘a koe makatu‘ú

4.    Poufā ē makafākinangá
    Faitotonu he me‘a kotoá
    Mahiki‘anga ‘oe fonuá
    Tauhivā moe fuafatongiá

5.    Pounima koe makakoloá
    Tui ma‘u si‘eta suveniá
    Faimatekina pea nga‘ahoá
    Ma‘u‘anga ‘oe melengá

6.    Pouono ē kei sīlongó
    ‘Ofa ongo toki ‘ofa o‘ó
    Tukufonua ‘ae kau heló
    Tu‘uholoaki hono hueló

7.    Poufitu ē falemaamá
    ‘Amanaki ne haukafá
    Fakafelavai hono lalavá
    He kupesi ‘ae tufungá

ANFF levaleva ē malangá
Kau kalo ange he kuo lavá
Ki Lotopoha koe lata‘angá
Fakaongo mai ki hoto ngafá