Sivi Tau‘olunga ‘a e Fānau he Fe‘auhi Misi Heilala Tonga Masani Festivolo 2018 Featured
Liviu ‘Aati & Litilesā & Tohi / Art & Literature & Book Review
Sivi Tau‘olunga ‘a e Fānau he Fe‘auhi Misi Heilala Tonga Masani Festivolo 2018
Na‘e ma‘u ‘a e faingamālie ke lava atu ‘a e Nepituno ‘o mamata he sivi fe‘auhi faiva ta‘olunga ‘a e fānau he fe‘auhi fili Misi Heilala ‘a e Tonga Masani Fesitivolo 2018 na‘e fai he pō Monite ‘aho 1 ‘o Siulai he Holo Fakamanatu ‘o Kuini Sālote.
Na‘e kalasi lalahi ‘e tolu ‘a e sivi fe‘auhi misi tau‘olunga ‘o e Kātoanga Uike Helilala, ‘a ia ko e ‘uluaki ko e ta‘u 5 kihe ta‘u 8 na‘e toko 3 mo e ua koe ta‘u 9 ki he ta‘u 12 na‘e toko 8 pea mo e tolu ko e ta‘u 13 ki he ta‘u 16 na‘e toko 8
Na‘e Fakaafe Kakalangilangi ‘a e Tokoni Palēmia mo e Minisitā Takimamata ‘a ‘Eiki Sēmisi Sika, pea mo e kau fakamaau mataotao mo taukei he faiva ‘e toko 3, ‘a ia ko Lupe Ha‘amoa ‘Ilaiū mo Sisi‘uno Helu pea mo Gary Lavaki.
‘Oku mā‘uhinga foki ‘a e konga fakafonua mo fakakalatua ‘o e Kātoanga Uike Helilala, ‘a ia ‘oku kaunga lahi hono tauhi mo fakatolonga ‘a e ngaahi me‘a fakafonua mo fakakalatua, ‘o hangē ko e ngaahi ‘aati ‘a Tonga.
‘Oku kau he ngaahi ‘aati ‘a e faiva, tufunga mo e nimamea‘a ngaahi mata‘ikola ‘a e fonua, ‘o tokoni lahi ki he ‘ikonōmika mo hono tu‘uaki ‘a Tonga ki he ngaahi fonua muli ka e tautautefito ki he kau folau ‘eve‘eva.
Na‘e ma‘u foki ‘a e faiva tau‘olunga faka-Tonga mei he faiva tau‘alunga faka-Ha‘amoa, pea ‘oku ui ‘a e “‘aiuli” ‘i Ha‘amoa ko e “tulāfale” ‘i Tonga, ‘a ia ko e hingoa ia ‘o e “matãpule” ‘i Ha‘amoa (mo matãpule ‘a e tulāfale ‘i Tonga).
‘Oku tefito ‘a e tau‘alunga faka-Ha’amoa he tāfua (tātaimi) mo e fakataupasi ka e ‘ikai he ‘uhinga ‘o e ta‘anga pea haka vilo mo haka fetohoaki ‘a e tau‘olunga faka-Tonga, ‘a ia ‘oku ofi mo to e mama ‘o mei he ‘uhinga ‘o e ta‘anga.
Na‘e tefito foki ‘a e sivi fe‘auhi tau‘olunga he faiva haka neongo na‘e kau ai ‘a e faiva ta‘anga mo e faiva hiva, ‘o ‘uhinga ‘oku pau ke fakafa‘u/fakafatu ‘a e ta‘anga mo fakafasi/fakaafo ko e hiva pea toki fakahaka ko e tau‘olunga.
‘Oku ngāue‘aki he faiva ta‘anga/faiva maau, faiva hiva mo e faiva haka ‘a e ngaahi me‘angāue faka‘aati mo fakalitilesā ko e heliaki, tu‘akautā mo e hola, kaiha‘asi pē haka-funga-haka, ‘o tofitofi ‘a e vaa‘i‘uhinga, vaa‘itā mo e vaa‘ihaka.
Neongo kotoa ‘a e fekau‘aki vāofi ‘a e faiva ta‘anga, faiva hiva moe faiva haka, pea mo e heliaki, tu‘akautā mo e hola, kaiha‘asi pē haka-funga-haka ka ‘oku tefito pē ‘a e faisivi he faiva haka mo e hola, kaiha‘asi pē haka-funga-haka.
Neongo na‘e faka‘ofo‘ofa kotoa ‘a e ngaahi kalasi ‘e 3 ka ‘i he lau fakaikiiki fakakātoa na‘e mālie taha ‘a e kalasi 1 he kalasi 2 mo e 3 pea mo e kalasi 2 he kalasi 3, ‘o tatau ‘a e fakama‘ungahaka, tūkungahaka mo e vaa‘ihaka.
‘Oku kau ai ‘a e ngaahi vaa‘ihaka ‘a e ‘ulu ko e fakateki mo e kalo, mata ko e kamo, malimali, fakalaulaupisi (fakanisinisi / fakamanimani) mo e nima (fakatoukatea) ko e moka mo fāfā‘atā mo e va‘e he taulalo (tikili 30 mo e 60).
Na‘e ngāue‘aki lelei ‘a e ngaahi motu‘a haka mo e tefito‘i haka tupu‘a, ‘o kau ai ‘a e ha‘otā, vete, tui, aloalo, kako pea mo e ngaahi haka fo‘ou ko e fa‘ufo‘ou ‘a e pulotu haka, ‘a ia ‘oku takitaha faka‘ali‘ali ai ‘enau mohu ‘atamai mo fakapoto.
Na‘e ma‘u ‘a e tatau, potupotutatau mo e mālie mei hono to e tofitofi ‘e he pulotu haka ‘a e ngaahi vaa‘ihaka he founga fakatohala, ‘a ia ko e hola, kaiha‘asi pē haska-funga-haka, ‘o fakaola ko e māfana, vela mo e tauelangi.
