Menu
cache/resized/63614fa437cb694b8770470f544a87ea.jpg
“TOURS & TRAVEL AT IT’S BEST IS ...
cache/resized/de22811ba69e150b74276adfe9cd60f1.jpg
S&F Brothers (Car Dealer & Accounting ...
cache/resized/c5486089fb6fe141100fa93741aee80f.jpg
Vaiola Shop & Cafe  
cache/resized/952d37c5b239f200e4b0a944bfa8cde0.jpg
RED Rapid Engineering Diagnostic Specialize in: ...
Latest News

Faka’ilo ‘e Lord Tu’ivakano ‘a ‘Akilisi Pohiva mo e Letiō 87.5 ki he Lau’ikovi’i Featured

'Akilisi Pohiva mo Lord Tu'ivakano 'Akilisi Pohiva mo Lord Tu'ivakano

14 Tisema, 2017. Kuo fakamahino mei he loea ‘a Lord Tu’ivakano William Clive Edwards kuo mei maau malie ‘enau ngāue ki hono faka’ilo ‘e Lord Tu’ivakano koe Sea Malōlō ‘o e Fale Alea ‘o Tonga ‘a Samuela ‘Akilisi Pohiva pehe ki he Letio 87.5 ‘a Katalina Tohi ki he fakalotokovi mo e lau’ikovi’i.

Ko e faka’ilo lau’ikovi’i foki ‘eni fekau’aki mo e ngaahi lea ‘a ‘Akilisi Pohiva lolotonga ‘a e kemipeini ‘a e Paati PTOA ki he fili Fale Alea ‘o e ‘aho 16 ‘o Nōvema ‘a ia na’e tukuaki’i ai tokua ‘e Pohiva mo e PTOA ‘a e Sea ‘o e Fale Alea Lord Tu’ivakano ‘oku kau atu ki hono fe’ave’aki ‘a e pa’anga ‘uli ki muli (money laundering).

Ko e lea foki ‘eni na’e fakahoko ‘i he po’uli ‘o e ‘aho Tusite 17 ‘o ‘Okatopa ‘i he Holo Hoositea ‘i Fua’amotu lolotonga ‘a e kemipeini ‘a e Paati PTOA ma’a Penisimani Fifita pea na’e fakamafola fakahangatonu ‘i he letio 87.5 ‘a Katalina Tohi ‘a ia koe memipa pe moia ‘o e PTOA.

Na’e ‘ikai foki ko hono toki fakahoko ‘eni ‘o e lea ko’eni ka na’e meimei fakahoko ‘i he feitu’u kotoa na’e ‘a’ahi kiai ‘a e PTOA lolotonga ‘a e kemipeini pea na’e ‘ikai ha’a nau fakamo’oni kiai ka koe tukuaki'i tokua pe koe lisi ‘o e toko 14 na’e ma’u mei he Pangikē Pule ‘oku nau kau atu ki he ‘ave pa’anga lalahi ki muli ko'eni pea koe pa'anga 'uli.

‘Oku mahino pe foki ia kuo pau ke lekooti ‘e he Pangikē Pule ia ‘a e kau ‘ave pa’anga lalahi ki muli ka ‘oku ‘ikai ‘uhinga ia ‘oku hoko hano ‘ave ‘a e pa’anga ‘uli pe koe money laundering hange koia koe tukuaki’i ‘a Pohiva mo e PTOA pea 'oku te'eki ke faka'ilo pe ta'ofi 'e he Pangikē Pule 'a e fe'ave'aki pa'anga ko'eni he 'oku 'i ai hono lao mo hono tu'utu'uni.

Fakatatau ki he fakamatala ‘a Lord Tu’ivakano na’e ‘ikai hano faingamalie ke fakahoko ha tali ki he tukuaki’i loi mo ta’emo’oni ko ‘eni he na’e pule’i lelei ‘e ‘Akilisi Pohiva mo e PTOA ‘a e letiō mo e Televisone pea tui ‘a e kakai tokolahi ki hono tukuaki’i ‘o ‘ona neongo na’e ‘ikai mo’oni he koe taumu’a faka-kemipeini pe ke fili ‘a e kakai ‘iate kinautolu pea na'e lava 'enau taumu'a.

‘Oku mahino pe foki ‘e toki fakahoko pe ‘a e fakatonutonu ko’eni ‘i he mahina ko Sanuali he ‘oku ‘amanaki malolo ‘a e Pule’anga ‘o teuteu ki he ngaahi ‘aho tu’utu’uni.

4 comments

  • Olini Palei
    Olini Palei Friday, 15 December 2017 15:18 Comment Link

    'E pule pe lao he me'a kotoa pea tau tali hono ngaahi ha'aha'a.

    Report
  • Aisea Matiu
    Aisea Matiu Friday, 15 December 2017 14:04 Comment Link

    'Oku to e mama lelei mo mahu'inga malie lahi ange 'a e 'atikolo loloto mo mahino he 'analaiso 'o e Vakai Faka'eitita 'a e Nepituno ko e "Saikolo 'o e taufehi'a he tuku'au fakahisitolia 'o e liliu fakapolitikale" hono faka'ilo ko 'eni 'e Nopele Tu'ivakano 'a 'Akilisi Pohiva mo Katalina Uili Tohi mo 'ene Leito Temo ko e laukovi ko e hokohoko atu 'a e laukovi tatau 'e 'Akilisi mo e Kele'a 'a e kau ma'umafai mo e kakai he ngaahi ta'u lahi.

    'Oku fehangahangai 'a e laukovi he funga 'o e loi mo e kaka mo e laulelei he funga 'o e lelei mo e mo'oni pea fakatupu 'a e laukovi mei he lotokovi pea fakatupu 'e he laukovi mo e lotokovi 'a e taufehi'a mo e 'ita ko e me'angaue fakapolitikale hono fakakonahi 'a e ongo mo e loto mo fakakuihi 'a e 'atamai mo e fakakaukau 'o e kakai 'a ia 'oku fehangahangai mo e maama mo e mahino 'a e 'atamai mo e lelei 'a e ongo mo e loto 'o e fonua.

    'Oku fakaloloma ko e kau ai 'a e kau ako mo e kau lotu lelei pea neongo hono 'ilo mo mahino lelei ki he 'atamai mo e fakakaukau 'a e mo'oni mo e totonu ka e hanga 'e he siokita mo e siome'a 'o ofe'i mamahi ki he loto kovi mo e taufehi'a 'o hoko ko e fellei ki he tau'ataina mo e temokalati.

    'Oku to e fehu'ia pe 'oku mmahino koa ki a 'Akilisi mo e kau Temo 'a e 'uhinga 'o e temokalati ko e tauhilao mo e lao he'enau fai 'a e me'a ko e laukovi mo lotokovi 'a ia na'e tupu ai hono veteki 'a e Falealea ko e pulekovi mo e takikovi 'a e PM mo hono Pule'anga ka e kei poupou pe ki ai kakai 'o mahino kuo lahi honau fakakonahi mo fakakuihi!

    Report
  • Fakalalafu
    Fakalalafu Friday, 15 December 2017 12:24 Comment Link

    Tau lue atu pe he 'ikai puli ha me'a. Koe ngongohe fakalotu 'a Katalina 'oku malie pea toe lesoni.

    Report
  • Inoke
    Inoke Friday, 15 December 2017 11:50 Comment Link

    'Akilisi mo Katalina, ta ko e kaatoanga mo hono tutuku. Kuo alu hake pe eni e 87.5 ia ke toutou fakailo ia hange ko e Kele'a. Oku teeki osi enau hopo mo e kautaha toli Aositelelia he ongoongo loi. Ikai tama ke fe'unga hoo mou tufaki kosipeli he po'uli pea omai e ongoongo loi ia ikai feunga mo hoo mou talaki e kosipeli ee. Kai hake ena!

    Report

Leave a comment

Make sure you enter all the required information, indicated by an asterisk (*). HTML code is not allowed.

back to top