‘Ikai toe tali kainga Ongo Niua ke folau ange MV ‘Otuanga’ofa ^Featured

‘Oku anga maheni ‘aki foki ‘a e folau tu’o taha he mahina ‘a e vaka ko’eni ‘o e Pule’anga ki he ongo motu ni pea pea ‘oku totongi foki ‘e he Pule’anga ‘a e konga ‘o e fakamole ki he folau ko’eni makatu’unga ‘i he mamafa ‘a e totongi folau.

Fakatatau ki he fakamatala 'a e ongoongo 'a e Letio Tonga, ko e makatu’unga ‘a e fai tu’utu’uni ko’eni ‘a e ongo kainga mei he ‘ikai fakafiemalie ‘a e fakahoko fatongia ‘a e vaka ni ‘a ia ‘oku ‘ikai foki ke folau ‘o no’o ki uafu kae li taula pe mei he loloto.

‘Oku fakamahino mei he kainga ‘a e ‘ikai malu ‘eni ki he kau pasese pehe ki he’enau uta pea ‘oku laka ange kenau feinga ki ha vaka kehe.

‘I he taimi tatau kuo fakamahino ‘e he kosilio tenau ngaue’aki ‘a e MV ‘Onemato ‘a ia koe vaka ia ‘o e kainga ‘Eua pehe ki he MV Vaomapa ‘a ia koe vaka ia ‘o e kautaha Tofa Ramsay Shipping.

Na’e fakaha mei he kautaha Friendly Islands Shipping Agency (FISA) ‘a ia ‘oku nau fakalele ‘a e ‘Otumotu Anga’ofa ‘oku ‘uhinga ‘a e ‘ikai no’o ‘a e vaka ki uafu koe ‘ikai malu ‘a e uafu pehe ki he ngaahi ‘uhinga fakamalu’i pe.

Kaikehe ‘oku fo’ou foki ‘a e ta’efiemalie ‘a e kainga pea ‘oku nau tau’ataina foki kiai pea ‘ikai ngata ai ka ‘oku lahi mo e ngaahi vaka kenau fili kiai.