Hiki Totongi Kava Tonga Featured
Nuku’alofa, 2 Novema 2015. Kuo a’u mai ‘eni ki he tu’unga kuo hiki ‘a e totongi ‘o e kava Tonga ‘i he maketi pea ‘oku ‘i ai ‘a e faka’ilonga ‘e honge kava ‘a e fonua ‘i he a’u mai ki he ngaahi mahina si’i ko’eni kuo tau situ’a kiai.
Ko e totongi angamaheni ‘o e Kava Tonga na’e nofo ‘i he $20 ki ke $25 ki he kilo ka ko’eni kuo a’u ki he $30 ki he $40 ki he kilo.
Ko e fua momoa leva kuo a’u ‘eni ki he $19 ki he kilo ‘a ia ko’ene hiki ia mei he $12 he tu’unga anga maheni na’e ‘i ai. ‘Oku kau foki ‘eni ia he monū ki he kau tō ngoue kava pea na’e fuloa mai pe foki ‘a e tō lalo ‘a e tu’unga totongi ia ‘o e kava ‘o fakatatau ki he lahi ‘a e ngāue mo e fakamole ‘oku fakahoko kiai.
‘Oku mahino mai koe taha ‘o e ‘uhinga ‘o e hiki ko’eni ‘o e totongi ‘o e kava he maketi ko hono fakaava mai koia ‘a e maketi mei Siamane mo ‘Iulope ‘a ia ‘oku ‘i ai ‘a e fiema’u kava mei ai pea ‘oku takimu’a ‘a e tangata pisinisi kava ‘iloa koia ko To’imoana Takataka ‘i hono fua momoa mo fakatau lahi mai ko’eni ‘o e kava ke fakakakato ‘a e fiema’u ‘a e maketi mei ‘Iulope.
Ko e vahefonua Vava’u foki mo ‘Eua ‘oku lahi ai ‘a e kava pea ‘oku fiefia lahi foki ‘a e kau ngoue to kava ‘i he hiki ko’eni ‘a e tototongi ‘o e kava ka ‘i he taimi tatau ‘oku ongo ‘eni ki he kau inu kava ‘o e fonua ‘a ia ‘oku pau ke toe fai hano fakakaukau’i ‘a e totongi ‘o e holo pe koe fea ‘i he ngaahi kalapu kava Tonga ‘a ia ‘oku kei tu’uma’u pe ‘i he $5.
‘Oku kau foki ‘a e kava Tonga he ma’u’anga pa’anga tefito ‘a e kau ngoue ‘o tautautefito ki he Vahefonua Vava’u mo ‘Eua.
3 comments
-
Koe 'ongoongo lelei ia kihe kau ngoue 'o Tokanga moe Tangata 'oe Kelekele, ka 'oku totonu pe ke hokohoko atu pe hono too, fefe kapau 'e takitaha to ha fu'u kava e 10 hoto api tukuhau ? pea fu'u kava 'e 5 hoto 'Api Kolo pea malava pe 'ae fiema'u fksosiale pea ma'u ai ha ki'i seniti kihe totongi 'ako 'ae Fanau. Ka 'e Lava ????
-
Sai ke hiki kae fakasi'isi'i e 'aho ia 'a e kau pukepuke fonua pea ke nau si'i 'ilo 'oku 'iai e me'a koe pongipongi. Kau lelei ki si'i kau ngoue kava.
-
Ko e ongoongo lelei eni, pea 'oku tonu ke toe mamafa ange. Na'a hange ko e mokohunu, fua atu he $80 ki he 1kg mata, pea fakamomoa ia 'e he kau siaina 'o $1000 ia i Siaina, he 'oku ngaahi mei ai e me'a kehekehe ia hange ko e faito'o, fo'i'akau ki he puke. Ko e kava 'oku ngaahi 'aki mo e me'a kehekehe hange ko e koa kaukau mo e faito'o moe me'a pe ku tu'umalie ai e kainga muli ia, Mou fakatokanga'i e ngaahi me'a koena, he ka ne 'ikai kemou tokava 'o fakamomoa he'ikai lava 'enau 'u product 'oku nau hanga mai moia mei muli ke 'ai 'aki. Toe hiki hake ki 'olunga ke to e mole!