"‘Oua ‘E Toe Fai Mai Ia Ki he ‘Ikale Tahi": Tonga 28 Canada 18 ^Featured

Ko e fe’auhi foki ‘eni ki he Ipu ‘a e Pasifiki ‘a ia ‘oku ‘iloa ko e Pacific Nations Cup. ‘Oku langa’i ‘e he ikuna ko’eni ‘a e māfana ‘i he kakai ‘o e fonua pea ‘oku kamata kene fakafoki mai ‘a e ongo na’e ‘i he loto ‘o  e kakai Tonga lolotonga ‘a e fe’auhi ki he Ipu ‘a Mamani ‘o e ta’u 2011.

Ko e kai ‘o e ‘Ikale Tahi na’e ma’u ia mei ha tata’o ‘e 2 na’e fakahoko ‘e he Haafe va’inga fakaholomamata koia ko Sonatane Takulua pea mo e tata’o na’e fakahoko ‘e he Kapakau Talifaki ko ia ko Otulea Katoa.  Na’e ‘akahi ‘e he Feesi ‘a e ‘Ikale Tahi Kurt Morath ‘a e tata’o ‘e ua ‘o hū pea na’a ne fakahoko mo e ‘akatautea ‘e 3 ‘o ma’u ai ‘a e kai 28 ‘a e ‘Ikale Tahi.

Ko e kai ‘o Kānata na’e ma’u ia mei he tata’o ‘e ua na’e fakahoko ‘e he ‘enau tangata Huka va’inga mālie koia ko Aaron Carpenter. Na’e akahi ai ‘e he ‘enau Haafe Gordon McRorie ‘a e tata’o ‘e taha ‘o hū pea na’a ne toe fakahoko mo e ‘akatautea ‘e 2 ‘o ma’u ai ‘a e kai 18 ‘a e timi ‘a Kānata.

‘Oku ‘i ai ‘a e fakatu’amelie heni ki he ngaahi tau ‘oku hanga atu kiai ‘a e ‘Ikale Tahi pea ‘oku ‘ikai ke puli ko e faofao lelei 'eni ‘oku fakahoko  ‘e he’etau fānau va’inga ‘o teuteu ai ki he teuteu tau’i ‘o e Ipu ‘a Mamani ‘oku ‘amanaki fakahoko ki ‘Ingilani ‘i Sepitema.

‘Oku lolotonga taki ‘a Ha’amoa mo Fisi ‘i he tepile lau poini hili ia ha’ana mahanga 30-30 ‘i he’ena fepaki ‘aneafi Falaite 24 ‘o Siulai 'i he mala'e Bonney Field 'i Sacramento 'i Kalefonia USA.