Fili ‘a Toutai Kefu ke Faiako ‘Ikale Tahi Featured
Toutai Kefu
Nuku’alofa, 6 Mē 2016. Kuo fili ‘a e tangata Tonga ka ko e Fika 8 tutuku ‘a e Wallabies ‘a ‘Aositelēlia mo e Reds ‘a Kuinisilani Toutai Kefu kene hoko ko e faiako ‘a e Timi ‘Ikale Tahi.
Fakatatau ki he fakamatala mei he ‘Iunioni ‘Akapulu ‘a Tonga, ko hono fili ko’eni ‘o Kefu na’e tali ia mo poupou’i ‘e he Sea Fakataimi ‘o e ‘Iunioni Fe’ao Vunipola hili ange ‘a e polosesi anga maheni.
Ko e fatongia mamafa foki kuo tuku kia Kefu ‘o kau ai hono teuteu’i ‘a e Timi ‘a e ‘Ikale Tahi ki hono tau’i ‘o e Ipu ‘a Mamani 2019 ‘i Siapani. Ko hono fetongi ‘eni ‘e Kefu ‘a Mana ‘Otai pea ‘oku tokoni leva kiai ‘a e tangata ‘Ikale Tahi tutuku koia ko Siua Taumalolo.
Ko hono fili ‘eni ‘o Toutai Kefu hili ia ‘a e fehulunaki na’e hoko he ‘Iunioni ‘Akapulu ‘a Tonga pea na’e pau ai ke to’o fakataimi ‘a e tokoni ‘a e Poate ‘Akapulu ‘a Mamani (IRB) ki Tonga ni.
Ko e palopalema koia kuo fakahoko hono fakalelei’i ‘i he kau mai ‘a e Pule’anga Tonga pea ‘oku ‘i ai ‘a e ‘amanaki ‘e hoko lelei atu ‘a e maa’imoa ni.
2 comments
-
'OKU 'IKAI KO HA FILI FAKAPOTOPOTO ENI...Neongo ko e tangata vai'inga 'iloa 'a Toutai Kefu 'i 'Aositelelia, 'oku 'ikai fakahā mai ha'a ne taukei faiako, pe tokoni faiako 'akapulu 'iunioni 'i he tu'unga fake-tu'apule'angá.
1) 'Oku tau kei pukea 'i he pehē ko e tangata Tonga va'inga faka-tu'apule'anga kotoa 'oku nau poto 'i he faiakó.
2) Ko e faiako 'i he tu'unga tau fakafonuá, 'oku fiema'u 'a e taukei ta'u lahi 'i he tokoni faiako faka-tu'apule'anga, pea mo e faiako pule (head coach).
3) Na'e tokoni faiako faka-tu'apule'angá, pe kuo faiako pule faka-tu'apule'anga 'a Toutai Kefu? -
Kau eni he ongoongo fakafiefia kihe Tonga kotoa. Kae 'ofa pe 'e 'ikai toe toho atu 'e Fe'ao Vunipola 'ae fu'u 'olokuonga ko ena ko Siaosi Atiola he kuo fuoloa 'ene expire.