Fakahū atu ki he Fale Alea Fokotu’u Fili Fakahāloto ke Fakahifo ‘a e Palēmia Featured
Fakafofonga Nōpele Fika 1 ‘o e Vahefonua Tongatapu Lord Tu’ivakanō
5 Sepitema, 2019. Kuo fakahū atu ‘i he uike ni ki he Fale Alea ‘o Tonga ha fokotu’u Fili Fakahāloto (Vote of No Confidence) ke fakahifo ‘a e Palēmia Samuela ‘Akilisi Pohiva mei he lakanga taki ‘i he Pule’anga.
Ko hono fakahā ‘eni ‘e he Fakafofonga Nōpele Fika 1 ‘o e Vahefonua Tongatapu Lord Tu’ivakanō 'o fakafofonga'i mai 'a kinautolu 'o e Hou'eiki Mēmipa 'o e Fale Alea ‘e toko 10 kuo 'osi fakamo'oni 'i he fokotu'u ko'eni ‘o fakatatau ki he tu’utu’uni ngāue ‘a e Fale Alea ke fakahū atu ‘a e fokotu’u ko’eni pea ‘oku fakahoko pe ‘eni ‘o fakatatau ki he tu’utu’uni ‘a e Kupu 50B ‘o e Konisitūtone ‘o Tonga.
‘I he me’a ‘a Lord Tu’ivakanō na’a ne fakamahino ai neongo ‘oku mahino ‘a e fika ia mo e tokolahi ‘a e tafa’aki ‘a e Pule’anga ‘i he lau pāloti ka ‘e ‘ikai tuku ai honau fatongia na’a nau fuakava ke fakahoko telia ‘a e lelei ‘a e fonua mo e kakai he ‘oku lahi fau ‘a e faihala 'oku hoko ‘i he Pule’anga pea ‘oku ‘ikai fa’a laua hono ngaahi fakamo’oni.
Na’a ne toe me’a foki ‘o pehē ‘oku tokolahi ‘a e kakai ‘i he fonua ‘oku nau loto mo poupou ke fakahoko ‘a e Fili Fakahāloto pea ke ‘ilo ‘e he kakai ‘o e fonua ‘oku ‘i ai ‘a e palopalema lahi ‘oku hoko ‘i he anga hono tataki kinautolu.
Na’e ‘ikai ke me’a ‘a Lord Tu’ivakanō ki he kakano ‘o e Fokotu’u Fili Fakahāloto ko’eni ke fakahifo ‘a e Palēmia ka na’a ne fakamahino pe koe fakahoko ‘o ha Fili Fakahāloto ‘oku mahino ‘oku ‘i ai ‘a e palopalema ‘oku hoko ka ‘oku kehe ‘a e ngaahi ‘aho ni he ‘oku hoko ‘a e palopalema ia ‘i hono tataki ‘o e fonua ‘i he taimi kotoa pea hoko faka’aho foki.
‘Oku tu’utu’uni foki ‘e he Konisitūtone ‘o Tonga (Kupu 50B) koe ‘osi ‘a e mahina ‘e 18 mei he hoko ‘a e Pule’anga kuo fili ki he fatongia ‘e ‘atā leva ke fakahoko ha Fokotu’u ki ha Fili Fakahāloto kapau ‘oku ‘ikai ke fakafiemālie ‘enau fua fatongia.
‘Oku ‘amanaki foki ke toe ava pea hoko atu ‘a e Fale Alea ‘i he uike kaha’u.
14 comments
-
'Oua 'e tuku ho'omou ngaue lelei ki hono tau'i 'o e faihala he 'oku fu'u 'ilonga pea fakamaa pea kuo fuoloa e taimi ke fakahifo he kuo lahi e maumau.
-
Poupou 1000%
-
Oku ou poupou 100% kihe fokotu'u ko eni ke tuku ae tangata'eiki ka koe Palemia o Tonga ki tu'a mei hono lakanga taki ihe fonua.makatu'unga ihe lahi ae ngaahi faihala ihe loto'i Pule'anga ihe ngaahi potungae kotoa oku fakamalumalu iateia.oku toe lahi foki moe moveuveu ihe fonua pea kuo faka fa'afa'ahi ae fa'ahinga oe tanga'i fonua kotoa pe.oku lahi foki moe fakamala'ia moe faiangahala kuo hake uta ihe fonua aia na'e ikai ketau anga kiai.oku makatu'unga kotoa pe eni meihe taki.koia oku tafe hifo mei ai ae ngaahi me'a kotoa ko eni.tuku kehe ange foki 'a 'ene feinga ke to'o ae mafai oe Tu'i oku ha kotoa mai ia ihe ene polokalama pea moe fo'i Lao fakaangaanga e 6 aia na'e ikai tali ehe kakai oe fonua malo moe faka'apa'apa atu. Semisi Pai.
-
Poupou 100%kiai