Pekia hono Inu ‘o e Faito’o Fanavao Featured
Nuku'alofa, 8 Sanuali 2016. Na’e hoko ha fakatamaki ‘o si’i pekia ha tangata’eiki ta’u 62 he Falemahaki Vaiola ko Mateni Topui ‘o Navutoka Tongatapu hili ia ha’a ne inu ha hina faito’o fanavao. ‘Oku mahino foki koe fakatu’utāmaki ‘eni na’e tupu mei hano feto’oaki ‘a e hina vai Tonga na’e ‘oange kia Topui mo e hina faito’o fanavao na’a ne inu ‘o tupu ai ‘ene pekia.
‘I ha fakamatala mei he Potungāue Polisi na’e hili hono inu ‘e he pekia ‘a e hina faito’o fanavao pea oki fakatokanga’i hake ‘e he famili ‘oku faikehe hono sino mo ‘ene to’onga pea nau iku leleaki’i ai ‘a e pekia ki he Falemahaki Vaiola ‘i he faka’osinga ‘o Tisema pea ne si’i pekia he ‘aho Monite 4 ‘o Sanuali.
Na’e fakahoko ‘a hono sula ‘o e pekai pea fakapapau’i mei ai koe makatu’unga ‘o ‘ene pekia ko hono inu ‘o e faito’o fanavao ko’eni. Na’e fakahoko ai pe hono me’afaka’eimi he ‘aneafi ‘aho Tu’apulelulu ‘o Sanuali 2016.
‘Oku hoko ‘a e pekia ‘a Topui kene ‘omai ‘a e fakatokanga ki he ngaahi famili ‘i he fonua kenau toe tokanga ange ki hono tauhi ‘o e ngaahi faito’o kemikale pea ke fakapapau’i ‘oku ‘i ai ‘a e feitu’u mavahe mo malu ke tauhi kiai telia ‘a e ngaahi fakatu’utamaki natula pehe ni pea ke ‘oua ‘e toe hoko he kaha’u.
