Tokoni mai 'Aositelelia misini generator 2MWh Cummins Genset ki he Poate 'Uhila 'a Tonga

Na'e foaki 'a e tokoni ko'eni ki he Poate 'Uhila 'a Tonga 'e he Haikomisiona 'a 'Aositelelia ki Tonga HE Rachael Moore pea na'e fakahoko'eni ki he senita 'oku fo'u mei ai 'a e 'uhila 'a Tonga 'i 'Anaa. 

'Oku fe'unga 'a e mahu'inga 'o e misini fakatupu 'uhila ko'eni mo e pa'anga 'e taha miliona tolumano valuafe ($1.038 miliona) pea koe konga 'eni 'a e polokalama fetokoni'aki 'a e ongofonua ki he fakalakalaka 'a e ma'u'anga ivi 'i Tonga.

Ko hono fakahoko mai ko'eni 'a e tokoni 'a e Pule'anga 'Aositelelia 'oku taimi totonu 'eni he koe taimi 'eni 'oku lahi ai 'a e palopalema 'i he matemate 'a e 'uhila pea 'oku lahi ai 'a e fehanuaki 'a e kakai 'o e fonua pea 'oku talanga'i lahi 'a e kaveinga ko'eni 'i he Fale Alea 'o Tonga.

'Oku mahino foki mei ha lipooti 'a e Poate 'Uhila 'a Tonga ki he Fale Alea 'a ia na'e tepile'i 'i he 'aho ni 'i he Fale Alea pea feme'a'aki kiai 'a e Hou'eiki Memipa ko e ngaahi misini fo'u 'uhila 'a e Poate 'Uhila 'a Tonga kuo laka hake he ta'u 'e 20 honau motu'a pea 'oku 'i ai 'a e ngaahi misini ai 'oku maumau.

Na'e toe fakaha foki 'i he lipooti ko'eni koe 'uhinga 'o e matemate 'a e 'uhila he 'oku lolotonga fakahoko hono tesi 'a e sisitemi fo'ou 'oku ngaue'aki 'e he Poate ke fakafetaulaki 'a e ma'u'anga 'uhila mei he ngaahi misini fo'u 'uhila mo e ma'u'anga ivi mei he la'a mo e havili 'a ia kuo 'osi fokotu'u pe 'i Tonga ni.

'Oku 'i ai foki 'a e 'amanaki 'e hoko 'a e tokoni ko'eni kene fakasi'isi'i 'a e palopalema fekau'aki mo e ma'u'anga 'uhila 'i Tonga ni.