“Kava Kuo Heka” [“‘Omi ia Ma’a Tupou Tupou VI”]: Taumafakava Fakanofo Tu’i Kanokupolu Hono 24 ^Featured

Ko e fakanofo foki ‘eni ‘o fakatatau ki he talatukufakaholo ‘o e fonua mei ono’aho ‘a ia na’e fa’a fakahoko ‘i he koka fakanofo’anga Tu’i ‘a ia ‘oku tu’u ‘i Hihifo, Tongatapu.

Na’e ‘Olovaha pē ‘a ‘Ene ‘Afio Tupou VI ko e Hau ‘o e ‘Otu Tonga pea ‘Apa’apa e Hau ‘a Motu’apuaka mo Lauaki ‘o hange koe tala ‘a Lo’au. Na’e ‘i he Tou’a ‘o Fakahoko ‘a e Fakamuifonua ‘a e Ta’ahine Pilisisesi Lātūfuipeka Tuku’aho pea mo Ha’a Ngata mei he Tou’a ‘Eiki. Ko e Taumafakava foki ‘eni na’e Tano’a tolu ‘a ia koe fakalangilangi he ko e ‘aho lahi ‘o hangē koe lau ‘a Pasemata Taunisila mei he Va’a Talafakafonua ‘a e ‘Ofisi ‘o e Palasi.

'Eiki Lupepau'u Taione

Masa

Na’e kei tu’u pe ‘a Tovi ‘i hono fatongia tupu’a ko e hala ia ki tu’a mo loto ‘i he ‘Alofi Kauhalalalo pea Mohulamu (Fua’amotu) leva ko e hala ki tu’a mo loto ‘i he ‘Alofi ‘o Kauhala’uta. Na’e fakahoko ‘a e Malanga mei Kauhala’uta ‘e Fa’aoa pea Malanga mei Kauhalalalo ‘a Tovi lolotonga ia hono ngaohi ‘o e Taumafa pehe ki hono teuteu ‘o e fono.

Ko e fono ‘o e Taumafakava ko e ‘umu hula na’e vahe ‘o fakatatau ki he Tala ‘o e  Fonua pea fakatatau ki he angi ‘a Motu’apuaka ‘a ia koia na’e fatongia mo pule ‘i he ouau Taumafakava ‘o hangē pe ko e tala mei ono’aho. Ko Pilinisi Ata leva na’a ne fakahoko ‘a e Malanga Tala ‘o e Fonua.

'Eiki Tupoumoheofo Tuita

'Eiki Melenaite Vete

Na’e kaifono ‘a Masa ko e matāpule Siapani ‘eni kuo lau ta’u ‘ene nofo ‘i Tonga ni ‘I He’ene ‘Afio pea hoko atu ki he fono ‘a e ongo ‘Alofi ‘a ia na’e lahi taha ‘o e ngaahi fono na’e kaifono ai ‘a ‘Eiki Lupepau’u Taione, ‘Eiki Simon Tu’ivakano, 'Eiki Tupou Moheofo Tuita/ Melenaite Vaha’i Vete pehē ki he toenga ‘o e Fale’alo mo e Hou'eiki 'o e Fonua.

Na’e hoko atu ki hono tufa ‘o e kava ‘a ia na’e mu’akikava ‘a ‘Ene ‘Afio Tupou VI ‘a ia na’e ‘Olovaha pea na’e tufa ‘a e kava koia ‘e Vakalepu ‘Ahio mei Ha’a Ngata ‘a ia koe taha ‘eni he makapuna 'o ‘Ahio koe ‘ulu ‘o Ha’a Ngata. Na’e fakafuofua ki he toko 80 ‘i he ‘Alofi ‘e taha ‘a ia na’e ofi ‘i he toko 200 ‘a e Hou’eiki Nopele, Kau Matāpule Ma’u Tofi’a, Kau Matāpule na’e kau ki he ouau faka hisitōlia ni.

Vakalepa 'Ahio

'Eiki Fatafehi 'O Lapaha Filipe & 'Eiki Simon Tu'ivakano

Ko e ngāue ‘o e ‘aho na’e fakafuofua ki he Puaka Toho ‘e 100, ‘umu Kaveitau ‘e 3000, Kalasi kehekehe ‘o e Kava mo e ‘umu ‘o hange koe ‘umu hula, ‘umu puaka ha’amo pehē pehe ki he ngaahi ngaue kehekehe pe ‘oku tu’utu’uni ‘e he Tala ‘o e Fonua ke fakakakato.

Tu'ivakano

Kauhala Lalo

Pilinisi Ata

Tu'iha'angana

Fielakepa, Tu'ilakepa & Tu'iha'ateiho

Tu'ipelehake

Tou'a

'Alofi

Tou'a

Na’e fakaha foki ‘e Pasemata Taunisila mei he ‘Ofisi ‘o e Palasi koe kau ‘eni he Taumafakava lahi mo faka hisitōlia pea na’e fakahoko ‘a e teuteu lahi ki ai ke ma’u ‘a e ‘ata totonu ‘o e oua ni ‘o fakatatau ki he taufatungamotu’a ‘o e fonua.

Na’e hili ‘a hono tufa ’o e Taumafa kava pea na’e fakahoko mai leva ‘a e fakafisi ‘o e Kava mei Ha’a Ngata ‘e ‘Eiki Nopele Vaha’i pea fakahoko leva ‘a hono fakamalo’ia ‘e Motu’apuaka ‘a Ha’a Ngata mo e fatongia ‘i hono teuteu ‘o e Taumafakava. Na’a angi ai pe ‘a Motu’apuaka ke hiki ‘a e tou’a pea koe ngalutuku ia ‘o e ouau fakahisitolia hono fakanofo Tu’i Kanokupolu hono 24 Tupou VI.

Ta'ahine Pilinisesi & Ha'a Ngata 'I he Tou'a

Liuaki Tama Tu'i Hili 'A e Ouau Taumafakava

Na’e ha’ele liuaki leva ‘a e Tama Tu’i ki Palasi pea na’e muimui atu ai ‘a e Ha’a Lātūhifo ‘o taki atu ‘e ‘Eiki Nopele Nuku ‘a e kau muimui mei Ha’a Lātūhifo.

Faitā 'a Christopher Tupou, Pelenaise Fonua & Viliami Fifita