Fekumi vakapuna tau Nu'usila ki he matāpule kei mole 'i tahi Featured
Vakapuna Orion 'a e Laulāpuna 'a Nu'usila
25 'Epeleli, 2017. Na'e kau mai he efiafi 'aneafi 'aho Monite 24 'o 'Epeleli 'a e Vakapuna 'a e Laulāpuna 'a Nu'usila (New Zealand Air Force) ki hono kumi 'o e matāpule ko Tupouniua Veamatahau na'e mole he vaha'a 'o Tongatapu mo 'Eua he efiafi Tokonaki 22 'Epeleli.
Na'e malava pe foki ke fetu'utaki 'a e matāpule ni ki hono fāmili pea fai ai mo e fetu'utaki ki he kau polisi. Ko 'ene fetu'utakoi ko'eni 'o fakamahino ai 'oku ne 'i he vaha'a 'o Tongatapu mo 'Eua.
Fakatatau ki he fakamatala 'a e kau polisi koe matāpule ni nae folau mei Manuka 'i he Hahake 'o Tongatapu 'i hono ki'i vaka koe fakataumu'a ki 'Eua. 'Oku mahino mai foki na'e hoko e palopalema ki he misini 'o e vaka 'o Veamatahau pea tupu ai 'a e palopalema ko'eni.
Na'e talu pe mei ai 'oku te'eki ongona ha toe fetu'utaki meia Veamatahau.
Na'e fakahoko foki 'a e ui tokoni mei Tonga ni ki Nu'usila 'o tukufolau ai 'aneafi 'a e vakapuna Orion 'a e Laulāpuna 'a Nu'usila 'o tokoni ki he kumi.
'Oku a'u mai ki he 'aho ni 'oku te'eki mahino mai 'a e tu'unga 'oku 'i ai 'a e kumi ka 'oku fakafuofua ki he kilomita sikuea 'e 16,600 'oku fai ai 'a e kumi ni.
