Ha me'a 'oku hoko ki he 'Ikale Tahi? ^Featured

 'Etita,

Kataki fakamolemole 'o 'oua 'e to'o mu'a 'eni koha fakaanga pe tukuhifo ka koe fifili ki he tu'unga 'oku 'i ai 'etau timi 'Ikale Tahi. 

'Oku mahino mai mei he va'inga 'aneafi mo e timi 'a Fisi 'a e 'ikai ho'ata mai ha teuteu pe koha palani va'inga 'a e timi 'Ikale Tahi pea iku ki he hange ia ha ako va'inga ia 'a e timi 'a Fisi 'i he'etau 'Ikale.

Mahalo koe 'ulungia lahi taha 'eni 'a e 'Ikale Tahi 'i Fisi talu 'a e fetaulaki 'a e ongo fonua ni hili 'a hono poko'i 36-0 'e Fisi 'a 'etau timi fakafonua.

Ko e ngaahi uike si'i kuo maliu atu na'e fakaha ai 'e he faiako 'a e 'Ikale Tahi Toutai Kefu koe tumu'aki 'eni kuo a'u ki ai 'a e 'Ikale Tahi hili 'a hono faka'ataa mai 'etau kau va'inga kalasi 'uluaki pea na'a nau tumutumu 'i mamani he va'inga 'akapulu.

'Oku kau heni 'a e kau mai 'a 'Isileli Folau na'e va'inga ma'ae Wallabies 'a 'Aositelelia pea mo Malakai Fekitoa mo Charles Piutau na'a na va'inga ma'ae All Blacks 'a Nu'usila.

Na'e toe fakaloloma ko hono toutou 'ohake 'e he kau fakamatala tau (commentators) 'a e Sky Sports 'o kau ai 'a e matapule Tonga ko Uili Lose 'a hono fehu'ia pe 'oku fefe 'a e fakakaukau 'a e Kapinteni mo e Faiako 'a e 'Ikale Tahi lolotonga hono fiu tafi 'e he 'Ikale Tahi 'a e faingata'a pea fa'ifa'iteliha pe 'a Fisi ia 'i he tapa kotoa 'o e va'inga.

Ko e ngaahi fifili kotoa ko'eni na'e 'ohake lolotonga 'a e va'inga ni ki he motu'a ni na'e matu'aki mo'oni pea 'ikai fihi 'i he vakai 'a e Tonga kotoa.

Ko e motu'a 'ikai va'inga 'akapulu au kae mamahi'i 'akapulu 'oku ou fokotu'u atu 'oku sai fakafo'itangata 'a 'etau fanau va'inga ka 'oku fiema'u ke fakama'opo'opo 'a e timi fakafaiako pea fakatonutonu leva 'a e ngaahi fehalaaki pea fokotu'u mo ha palani va'inga 'oku hoa mo e taleniti 'etau fanau.

'Oku kei fiema'u ke peseti 'e 100% 'a 'etau poupou mo teke 'etau 'Ikale Tahi pea ke tali 'a he timi mo e kau 'ofisiale 'a 'etau ngaahi fifili pea fakalelei'i.

'Oku fiema'u ke fakahoko fakamatoato 'eni kae malava ke kapapuna pea mafao atu 'a e kapakau 'etau 'Ikale Tahi.

Faka'apa'apa Atu

Mamahi'i 'Akapulu