Kole kia Tu’i Uata ke kataki 'o ki’i faifaimalie hifo Featured
Tohi Ki he 'Etita
Kole kia Tu’i Uata ke kataki 'o ki’i faifaimalie hifo
19 Fepueli, 2018
‘Etita,
Kataki mu’a kae tu’u atu ‘eku fakahoha’a ko’eni mo ‘eku kole telia na’a a’u atu ki he Minisita ko’eni na’e fili ‘e he Palemia tokotaha pe ko Tu’i Uata ke kataki fakamolemole mu’a kae ki’i faifaimalie hifo he kuo fu’u ope pea hulu ‘ene ta’e faka’apa’apa mo ‘ene ta’etoka’i ‘a e kakai mo e fonua.
Lolotonga ‘a e fakaakeake ‘a e fonua meia Gita pea mo e hela si’i kau ngāue ‘oku nau tokangaekina ‘a e malu mo e fakaakeake ‘a e fonua kuo tu’u atu ‘a e Minisita ko’eni ‘o tafulu’i mo lau ki he Pule ‘o e NEMO mo pehe tokua ‘oku fu’u tuai hono tufa ‘o e tokoni.
Ko e Minisita ko’eni mo e faka’ap’apa lahi kiate ia ‘oku ‘ikai ha’ane taukei ‘e taha fekau’aki mo e fakatamaki fakaenatula pea ko e me’a pe ‘oku ‘ilo’i ‘aki ia 'e he tokolahi koe lea ta’eufi mo e oho’oho mu’a pea ‘oku tekeutua mai pe ‘a e ‘ikai ha poini, losika moha ‘uhinga.
‘Oku ou tui tatau mo e tokolahi ‘o e fonua oku totonu ke loto ma’ulalo hifo ‘a e Minisita ni kane faka’apa’apa’i ‘a e kakai ‘o e fonua ‘oku nau taukei pea na'e ako'i mo hela ‘i hono fakahoko ‘a e fatongia he ‘oku ‘i ai hono founga mo hono ‘uhinga kae melino mo maau.
'Oku toe fiema'u ke muimui pau he founga ngaue mo e lao he kuopau ke lipooti 'a e tokoni pea ke taau hono vahevahe ka 'oku 'ikai koe kemipeini mo e faka'alinga lelei.
Na’e me’a atu foki ‘a e Minisita ni ki he MEMO ke fakaheka ‘a e tokoni ke me’a mo ia ‘o tufa pea iku ta’ofi ‘e he kau ngaue ‘o e feitu’u ni pea iku ai ki he’ene lau mo tafulu ki he Talekita ‘o e NEMO.
Na’e iku ‘o kole fakamolemole ai ‘a e Minisita ‘oku ne tokangaekina ‘a e Potungaue ko’eni ki he’ene Talekita ‘i he to’onga hono kaunga Minisita pea ‘oku ‘uhinga ai ‘a e kole ko’eni he ‘oku fu’u ‘ilonga fau ‘ene tukuhifo pe ‘e ia ia pehe ki he Kapineti.
'Oku 'uhinga 'a e kole ko'eni he 'oku lolotonga faka’ilo ‘etau Minisita ko’eni ki he laui’ikovi’i, na’a ne lea mai he mitia faka-sosiale ‘o tukuhifo ‘a e Tu’i pehe ki he kakai kehekehe pe, ‘oku te’eki totongi hono mo’ua mo ‘ene pisinisi ki he Pule’anga, ‘oku kei tu’u ‘ene pausa te’eki ma’u ha ngofua ke ngaue ‘i he ve’e Hala Taufa’ahau ‘i Havelu pea ‘oku fai e ngaue ‘a e ni’ihi ke vakai’i mo e ako’anga na'a ne fakakaungatamaki ai ‘i ‘Amelika.
Ko e me’a lelei pe ‘eni ia ke fai ha kole ki he’etau Minisita ko’eni ke fakamolemole ka e ki’i tu’u, sio, pea fanongo he na’e ‘osi ‘i ai pe ‘a e Minisita pehe ki mu’a pea na’e ‘ikai fuoloa kuo nofo mei he tapa’i laine.
‘Oku mahu’inga foki ke ‘oua ‘e fakapolitikale’i ‘a e tokoni ki he saikolone ko Gita he koe kakava ‘o e kakai totongi tukuhau ‘o e ngaahi fonua tokoni pea ‘oku ‘ikai ke fiema’u ke fai’aki ha kemipeini.
‘Oku ou tui pe ko hotau fatongia ketau lea' o kole ki hotau kau taki mo tokoni kenau fou ‘i he hala mo e founga totonu telia honau ngeia pea ke malu'i kinautolu foki.
'Oku fai 'eku kole ni 'i he loto fie tokoni mo'oni pea ko e fetaliui’aki ketau fepoupouaki.
Faka’apa’apa Atu.
‘Ofa Fonua
Hala Tupoulahi
Nuku’alofa
4 comments
-
'OKU 'IFE 'ENE TALA KO E TANGATA MAHENI PISINISI KE HEKA SEA PULE 'O E TBC?..'Oku faka-veve holo honau ngaahi vaka maumau 'I 42. Na'a ne tala.tokua kuo lahi e mole 'a e TBC. Ta ko 'ene 'alu 'o tuli 'a e kau ngaue taukei faiongoongo, pea ne fakangofua 'a e campaign 'a e PTOA hokohoko 'aho mo e po ta'e totongi, pea toe repeat mai tu'o 2, tu'o 3 'I he Letio 1 mo e Letio 2, mo e TV Tonga.
Ko e ma'u lesoni ia 'a 'Akilisi Pohiva mei a Bainimarama...he na'e faka-'aonga'i ta'e totongi 'e Bainimarama 'a e va'a Public Relations 'a e e Fiji Military ke "saturate" 'a e media 'o Fiji 'I he 'enau Fili Palemia 2016. Pea tala 'e 'Akilisi Pohiva ko e fakataataa lelei 'a Bainimarama ke fakataataa ki ai.
Ko ia ko e lohiaki'i 'o e kakai 'e Tu'i Uata ka e faka-'aonga'i ta'e totongi 'e he PTOA 'a e fakamafola lea 'a e Pule'anga, ka e faka'ofa e kau lele Fili Fale Alea tau'ataina, ko e ta'e faka-temokalati 'a e founga ko ia. Na'e 'ikai 'ilo 'e he mitia lotofonua 'o Tonga 'a e kaakaa ko 'eni. Totonu ke 'ekea 'e he mitia Tonga ke totongi mo'ua 'a e PTOA ki he 'enau ngaahi malanga campaign ta'e totongi 'aki 'a e fakamafola lea 'a e Pule'anga. -
Pea talaatu ke tangutu ma'u he'ene potungaue, pe koe ha 'oku 'ohonoa takai holo ai he ngaahi potungaue kehe. 'oku fu'u ma'uhala faufaua 'o pehe pe tokua ko 'ene minisita pea 'e ilifia atu ha taha ki ai; 'a ia minisita hu lalo uaea, na'e fili tokotaha pe 'e 'akili ke totongi'aki hono mo'ua kia 'uliti!!! Na'e 'I fe, ke toki 'asi hake pe 'o 'oho mo fakaaoao takai holo. Pea tuku e 'afunga he 'oku 'ikai peheatu 'e taha ko ha kili'i pinati, pea hala ke tau 'ilo atu 'ene ako pe na'e lava 'o tohi ha setesi pe 'ikai. Toki a'u eni 'ae sea faka-minisita ki he namu pipi moe ahi he ngaue 'ae kau ta'ekalasi ko eni.
-
ANGA 'I HE FA'IFA'ITELIHA 'I HE KAUTAHA 'O 'ENE TAMAI...pea na'a nau fa'ifa'iteliha pe 'I he pa'anga 'a e Kolisi Tutuku Liahona...kuo tukuaki'i 'enau kaiha'asi e kakava 'o e kau Kolisi Tutuluku. Te'eki ai ke to ha kakava 'o Tu'i Uata 'i ha'a ne ngaue 'a 'ana pe, ka ko e toitoi holo 'i he kautaha 'a e Kolisi Tutuku Liahona. Kalasi taha mo Lavulavu ko e namu holo pe 'i he kakava 'o e kakai. Kuo ala hona nima 'o to ha'a nau fu'u manioke pe 'ikai?
-
Ko e anga etau nofo he sosaieti, ka iai ha taha oku mavahe ene toonga moui mei he normal pea mahino leva oku abnormal. Kuo fuoloa taimi mai e ta’eta’ehuni a e Minisita koeni, te manavasii na kuo poto ia ia Solomone he Tohitapu.
Koe kalasi moui afungi ke takitaha nofo pe o tafu haka hoto api, tafului e kulo moe fakapaku.
Fakamalo atu kihe NEMO he ngaue lahi, tuku ketau sio ange pe koeha e loloa e kii Puleanga koeni.