Ko e Ta‘anga Hiva/Himi ‘Alo‘i ^Featured

Hiva/Himi 339

Kupu/Veesi 1

Fanongo ‘oku hiva mai

‘A e kau ‘āngelo

Ko e fakaongo lelei

‘A hotau ‘Otua

 Kupu/Veesi 2

‘I he lelei kuo hoko

Kuo tau ongo‘i

‘A e hoko mai ‘a Sisū

Ko hotau Huhu‘i

Kupu/Veesi 3

Kuo hoko ‘ae ‘Otua

Ko e tamasi‘i

Ko e toki me‘a mana

Ke tau vakai ki ai

Kupu/Veesi 4

Pea ke tau fakafeta‘i

Mo e kau ‘āngelo

Pea fakaongo lelei

‘A hotau ‘Otua

Kupu/Veesi 5

Kuo tupu ‘ae ‘Eiki

Ko ‘Imanuela

Ke tau fiefia lahi

‘I he‘etau ‘ilo

Kupu/Veesi 6

Ko hotau langomekina

‘I he‘etau hia

Ke tau fai tapuekina

Fakalaumālie

 Kupu/Veesi 7

Pea ke tau kumi lahi

Ke tau ‘ilo ia

Ko hotau Fakamo‘ui

‘Oku anga‘ofa

Tau/Kōlesi

He kuo ‘Alo‘i mai he ‘aho ni

‘I he ‘ai‘angakai ‘o e manu

Te Ne hoko he manava ‘o e fefine

Ke Ne fua ‘etau hia

Hiva/Himi 630

 Kupu/Veesi 1

‘Ā hake kāinga mo fakafeta‘i

Ta u fakamālō he mana Ne fai

‘I Petelihema he kuonga mu‘a

‘A e hoko tangata ‘a hotau ‘Otua

 Kupu/Veesi 2

Ne hoko ‘a e taimi mo Hono houa

Ke fotu ki Maama ‘a e ‘Eiki tupu‘a

Ha‘ele mai Ia mo e kau ‘āngelo

Pea fonu ‘a Langi he fakamālō

 Kupu/Veesi 3

Lau ‘e kinautolu ‘o hangē ko e Siu

‘E hoa ‘Ene nofo mo e Hau Aoniu

Ka e tuku ‘e Ia hono anga ta‘ehā

‘O ‘afio mai he tatau ‘o e tangata

 Kupu/Veesi 4

Vakai ki he potu Ne tokoto ai

‘Oi au Hono tuku he ‘ai‘angakai

Ko e ‘Eiki Ne fotu he ha‘oha‘onga

Na‘e ‘ikai ke hao he fale fononga

 Kupu/Veesi 5

Ne‘ine‘i he mavava ‘a e kau ‘āngelo

Ne‘ine‘i tukulolo ki ai ‘a e kau poto

Ko e me‘a na‘e puli tā ne nau lave‘i

Ko e si‘i Valevale ko hota Koeli

 Kupu/Veesi 6

Monū kinautolu he‘enau mātā

‘A e hū ki Mamani ‘a e ‘Imanuela

Ka e lahi kitaua he‘eta ‘ilo‘i

‘A e ngāue Ne hoko ki Hono ‘alo‘i

 Kupu/Veesi 7

Taau mo kitaua ke fakafeta‘i

He ‘Aho ‘Alo‘i ‘oku ta ‘i ai

Ko e me‘a tepū ē keta tukupā

Ke mateaki‘i ‘ae Hau taphuhā

 Tau/Kōlesi

Fakfeta‘i! Fakafeta‘i!

Ko e pehē ke tau noa

Fakamālō he ‘ofa ‘a hotau ‘Otua

Ne tuku ‘a Langi mo hono masani

Kae ha‘u ‘o huhu‘i ‘a e hia ‘a Mamani

Koe ki‘i kinikini, huluhulu, moe fakamatala nounou

‘Oku lahi taku koe ongo hiva/himi 339 moe 630 koe ongo hiva/himi ‘alo‘i (pē fā‘ele‘i mo fanau‘i) ka ‘oku tala ‘ehe ta‘anga kae tautefito kihe ongo tau/kōlesi koe ongo hiva/himi ‘alo‘i (pē fā‘ele‘i) moe pekia (pē hala; ‘aia koe fā‘ele‘i moe mate) koe hoa ta‘emavahevahe, ‘aia ‘oku tu‘otu‘atatau mo tuhotuhotatau ia moe tala‘ofa ‘ae ‘Otua koe Tamai (pē ‘Eiki) ‘oe ‘Otua koe ‘Alo (pē Foha). ‘Oku lau na‘e ‘ofa pehē ‘ae ‘Otua ki Mamani na‘a Ne foaki hono ‘Alo tofu-pē-taha na‘e fakatupu mo ‘alo‘i (pē fa‘ele‘i mo fanau‘i) ‘o mo‘ui he ‘Ene hoko mai ‘o tangata he manava ‘oe fefine (pē fa‘ē) mo pekia (pē hala mo mate) kae ma‘u ‘ehe fa‘ahinga ‘oe tangata he tui moe fakafeta‘i ‘ae fakamolemole moe mo‘ui ta‘engata mei he angahala moe mate ta‘engata.

 ‘Oku toe mālie mo‘oni hono uki mo talaki ‘ehe ongo hiva/himi ke ‘ā kae ‘oua ‘e mohe ‘o fanongo mo le‘o ‘a Mamani ‘ae tala fungani tu‘utai ‘oe hiva ‘ae kau ‘āngelo ‘o Langi koe fakaongo lelei ‘ae ‘Otua he ‘Ene tala‘ofa Hono tofu-pē-taha ke Ne hifo ‘o ‘alo‘i (pē fā‘ele‘i mo fanau‘i) mo pekia (pē mate) ka tau mo‘ui mei he mate. ‘Oku ‘uhinga kihe ‘ā mo le‘o ‘o lotu mo fakafeta‘i he mana moe ‘ofa ‘ae ‘Otua Ne fai ka tau mo‘ui ai. ‘Oku ‘ikai ngata pē he fakamālō kae toe “fakafeta‘i” koe fakatataua ‘o ‘ikai ngata pē he mafi moe ngeia ka koe toe mana moe ‘alo‘ofa ‘ae ‘Otua. ‘Oku ngāue‘aki ‘ae fakafeta‘i kihe ‘Otua moe Tu‘i, ‘o hangē koe fakatu‘uta ngāue (moe koloa) he taumafa kava he fakafeta‘i ‘ae holo, teu, moe ngāue hono ‘u‘ufi mo lelei hono fai.

Tau toki hoko atu.

 Tofā le malanga kae tau,

Fetongikava Dr Viliami Uasikē Lātū &

Hūfanga-He-Ako-Moe-Lotu Palōfesa Dr ‘Ōkusitino Māhina