Faka'anaua mei 'Api Tonga ^Featured

Ko e ta'anga faka'anaua ki he feinga ako 'a e fanau Tonga 'i he 'Univesiti 'o e Saute Pasifiki 'i Suva, Fisi pea koe fa'u 'e Dr. Viliami Uasike Latu pea Fakaafo 'e Salesi Pongi

SI’I SIU ‘A E TAVAKE TA MAFUA
KUMI ‘AIKONA KI HONO PUNUNGA
HANGE HA ‘OFA ‘OKU TALAMUKA
TISAINI ‘A E LOPA ‘O E HIFOFUA

HEHENGA ‘A TANGATA ‘O MAAMA
‘ESI AFI MEI PULOTU ‘A HONO TALA
MOFISI ‘O HUELO HA KALOFIAMA
KAHOA KI FELENITE SI’OTO KAKALA

LAUCALA TUKU KEU HUALELA
HE KO E ‘OFA KUO KAINIKAVEA
‘API TONGA KUO SI’I ‘EKU LEA
HO’O TOU’ANGA KOE TALI PAEA

SI’O VALA TO’ONGA KO E ‘OFA
PEA TEKIHI ‘AKI ‘A E FOLOFOLA
‘ATUKASIO ‘AIKONA ‘ETA KOLOA
TALI KIHA LIU MEI TU’A TONGA

TAU
TAULANGA SUVA HOKU ‘OFA ATU
HO’O TALIA E FOLAU VAKATAPU
KO SI’O KAHOA FAKATALUTALU
TAULEVA KI HE PA’ANGANAGALU

Fakamatala Nounou:

Ko e fa'u ko'eni koe faka'anaua ki he fakapaea kuo fakahoko 'e he fanau Tonga ko e fekumi ki he poto faka-'atamai 'i hotau fonua kaunga'api ki Fisi. 'Oku 'i ai foki 'a e 'Univesiti 'o e Saute Pasifiki (USP) mo e ngaahi ako'anga ma'olunga hange koe 'apiako fakafaito'o (FSM) pehe ki he 'apiako tohitapu 'o e pasifiki (PTC) pehe ki he ngaahi ako'anga ma'olunga kehe pea koe 'uhinga kiai 'a e faka'anaua ko'eni.

'Oku lahi ngaue'aki 'a e ngaahi lea heliaki ka 'oku mahino ngofua pe 'a e talanoa ki he tuku'au mai 'a e hisitolia mo hotau talatukufakaholo mo e fananga mo e anga 'a e nofo 'a hotau kakai. Tokua na'e kumi e afi 'o ma'u mei pulotu 'a ia koe faka'ilonga ia 'o e maama 'a ia na'e fakahoko 'i ono'aho ki pulotu 'a ia ko Fisi ia pea a'u mai pe ki onopooni 'oku kei ma'u pe 'a e maama mei pulotu (Fisi).

Kuo langa ki mui ni mai 'a e senita ki hotau kainga Tonga 'oku ui ko 'Api Tonga pea 'oku fakatahataha'i kiai hotau kakai tautautefito ki he fanau ako pea 'oku fakama'unga kiai 'a e fakapaea koe kumi maama ma'a e fonua.