Tipooti toko 6 Georgia mei Tonga Featured
5 Novema, 2016. Kuo fakafoki faka-pule’anga ‘a e toko ono na’a nau hū mai ‘aki ‘a e paasipooti loi ki Tonga ni ‘i he ‘aho Falaite 4 ‘o Novema ‘a ia koe Falaite ia ‘aneafi.
Na’e fakafoki foki ‘a e toko 6 Georgia ko’eni ‘a ia koe kakai lalahi ‘e toko 6 pea kau kiai mo e ki’i tamasi’i ‘i he folau ‘a e ‘Ea Fisi (Fisi Airways) ki Nadi ‘i he pongipongi ‘aneafi.
‘Oku ‘amanaki foki ke hoko atu ai pe ‘a e folau ‘a e ni’ihi ko’eni ki ‘Iulope ki he feitu’u na’a nau folau mei ai.
Ko e toko ono foki ko’eni na’a nau hū mai ki Tonga ni ‘i he ‘aho 22 ‘o Sepitema ‘aki ‘a e ngaahi paasipooti Kalisi (Creece) ‘a ia na’e kaiha’asi pea liliu mo e ngaahi hingoa kenau ngāue’aki.
Ko e hū mai foki ‘a e toko ono ko’eni ‘o taumu’a kenau folau ki Nu’usil hili ia ‘enau folau holo he ngaahi fonua kehekehe pea nau toki fou mai ‘o puke kinautolu ‘i Tonga ni.
Na’e tautea kinautolu 'i he Fakamaau'anga Lahi ‘i he ‘aho 26 ‘Okatopa kenau ngāue pōpula taki ta’u 2 kae toloi pea nau totongi ‘a e taki pa’anga ‘e 1000 TOP ki he Fakamaau’anga pea tu’utu’uni ken au mavahe ‘i loto he ‘aho ‘e 14.
