Fakahū atu ki he Fale Alea Fokotu’u Fili Fakahāloto ke Fakahifo ‘a e Palēmia ^Featured

Ko hono fakahā ‘eni ‘e he Fakafofonga Nōpele Fika 1 ‘o e Vahefonua Tongatapu Lord Tu’ivakanō 'o fakafofonga'i mai 'a kinautolu 'o e Hou'eiki Mēmipa 'o e Fale Alea ‘e toko 10 kuo 'osi fakamo'oni 'i he fokotu'u ko'eni ‘o fakatatau ki he tu’utu’uni ngāue ‘a e Fale Alea ke fakahū atu ‘a e fokotu’u ko’eni pea ‘oku fakahoko pe ‘eni ‘o fakatatau ki he tu’utu’uni ‘a e Kupu 50B ‘o e Konisitūtone ‘o Tonga.

‘I he me’a ‘a Lord Tu’ivakanō na’a ne fakamahino ai neongo ‘oku mahino ‘a e fika ia mo e tokolahi ‘a e tafa’aki ‘a e Pule’anga ‘i he lau pāloti ka ‘e ‘ikai tuku ai honau fatongia na’a nau fuakava ke fakahoko telia ‘a e lelei ‘a e fonua mo e kakai he ‘oku lahi fau ‘a e faihala 'oku hoko ‘i he Pule’anga pea ‘oku ‘ikai fa’a laua hono ngaahi fakamo’oni.

Na’a ne toe me’a foki ‘o pehē ‘oku tokolahi ‘a e kakai ‘i he fonua ‘oku nau loto mo poupou ke fakahoko ‘a e Fili Fakahāloto pea ke ‘ilo ‘e he kakai ‘o e fonua ‘oku ‘i ai ‘a e palopalema lahi ‘oku hoko ‘i he anga hono tataki kinautolu.

Na’e ‘ikai ke me’a ‘a Lord Tu’ivakanō ki he kakano ‘o e Fokotu’u Fili Fakahāloto ko’eni ke fakahifo ‘a e Palēmia ka na’a ne fakamahino pe koe fakahoko ‘o ha Fili Fakahāloto ‘oku mahino ‘oku ‘i ai ‘a e palopalema ‘oku hoko ka ‘oku kehe ‘a e ngaahi ‘aho ni he ‘oku hoko ‘a e palopalema ia ‘i hono tataki ‘o e fonua ‘i he taimi kotoa pea hoko faka’aho foki.

‘Oku tu’utu’uni foki ‘e he Konisitūtone ‘o Tonga (Kupu 50B) koe ‘osi ‘a e mahina ‘e 18 mei he hoko ‘a e Pule’anga kuo fili ki he fatongia ‘e ‘atā leva ke fakahoko ha Fokotu’u ki ha Fili Fakahāloto kapau ‘oku ‘ikai ke fakafiemālie ‘enau fua fatongia.

‘Oku ‘amanaki foki ke toe ava pea hoko atu ‘a e Fale Alea ‘i he uike kaha’u.