Fakafepaki’i ‘e he kau tō kava ‘a e fokotu’u ke pule’i ‘e he Va’a Pule Fakafuofua totongi ’o e kava Featured
26 Siulai, 2017. ‘Oku ‘i ai ‘a e hoha’a lahi ‘a e kau tō kava ki he feinga ko’eni ‘a e ni’ihi ke ‘ave ‘a e tototongi ‘o e kava ke pule’i ‘e he Va’a Pule Fakafuofua ‘a e Potungāue Leipa.
Kuo tā tu’o lahi ‘a e launga mo e feinga ‘a e ni’ihi ke holoki ‘a e totongi ‘o e kava ‘o pehe tokua ‘oku fu’u mamafa ka ‘oku fakafepaki’i lahi ‘eni ‘e he kau tō kava tautautefito ki he kau tō kava mei he Vahefonua Vava’u mo e Vahefonua ‘Eua.
‘I he fakamatala ‘a e tokotaha ‘o e kau tō kava mei he Vahefonua Vava’u ‘oku ne pehe ‘oku laulaunoa ‘a e feinga ko’eni he koe talu si‘enau fe’ao mai mo e ma’ulalo ‘a e totongi ‘o e kava pea ko ‘ene hiki ko’eni ke ma’u ai hanau faingamalie kuo feinga ‘a e ni’ihi ko’eni ke holoki ‘a e totongi makatu'unga he 'uhinga ngali siokita.
Na’e toe fakamahino pe foki ‘e he Pule Le’ole’o ‘o e Potungāue Leipa, ‘Anisi Bloomfied ‘i hano faka'eke'eke ia 'e he ongoongo 'a e Letiō Tonga oku fepaki ‘eni ia mo e lao ke pule’i e totongi ‘o e kava he ‘oku kau ‘a e kava ia ki he ngoue ‘oku tō pea koe ma’u’anga mo’ui ia ‘a e kakai ‘oe fonua.
‘Oku mahino ko hono ‘ohake ‘a e ngaahi fokotu’u ko’eni lolotonga ‘a e polokalama ‘a’ahi ‘a e Fale Alea ka ‘oku fakafepaki’i fefeka ‘eni ‘e he kau tō kava.
‘Oku fakaofi atu foki ‘a e totongi ‘o e kava ki he pa’anga ‘e $150 ki he kilo pea koe monū ‘eni ‘oku tofanga ai si’i kau to kava.
'I he fakamatala 'a e taha 'o e kau tō kava mei he Funga Fonua na'a ne pehe ai koe ngāue lahi 'oku fakahoko ki he kava pea 'oku tō pea tauhi 'i he ta'u 'e 3 pe pe lahi hake pea toe fakamole ki hono ta'aki mo ngaohi pehe ki hono tuki mo fakamaketi.
“Tuku pe mu’a ‘a e totongi ‘o e kava ke pule’i ‘e he maketi kae ‘oua ‘e ‘ai ia ke pule’i makatu’unga ‘i he fiema’u ‘a e tokosi’i ‘o kau ai ‘a e kau inukava ‘oku nau inukava pe mo mohe ta’e fai ha ngāue,” koe lau ia ‘a e taha ‘o e kau tō kava mei he Vahefonua Vava’u ‘oku ‘ikai loto ke fakahā hono hingoa.
‘Oku tui pe ‘a e ni’ihi 'o e kau ngoue kava ‘e ia pe ha taimi ‘e holo ai 'a e totongi 'o e kava ka ‘oku ‘ikai ko hono to’o honau faingamalie ta’e ‘i ai ha ‘uhinga lelei pea 'oku 'ikai ke faikava 'a e tokotaha kotoa 'i Tonga ni ka koe ni'ihi pe.
