Winston mo e Tāpuaki Vai Lahi pea Lulu'i mo e Fonua Featured
Taha 'o e Ngaahi Hala 'o Hala'ovave
Nuku’alofa, 16 Fepueli 2016. Lolotonga ‘a e fakatokanga ‘i he matangi ko Winston kuo tō foki moha tapuaki vai lahi he fonua 'i hono ta'au hili ia ha la’ala’ā ne fe’ao mai mo e fonua ‘i ha mahina nai 'e ua.
Ko e tāpuaki vai ko’eni ‘oku ‘ilonga lahi ia ‘i he ngaahi feitu’u ‘oku ma’ulalo ange mo toka'anga vai angamaheni ‘o hangē ko Sopu, Popua mo Halaovave kae pehē ki he ngaahi konga ‘o e Vāhenga Nuku’alofa pehe ki Pea, Ha’ateiho, Nukunuku mo e ngaahi feitu’u ‘oku ma’ulalo ange.
‘Oku mahino mai foki na’e ‘i ai ‘a e fiema’u vai ‘a e fonua ki he ma'u'anga vai inu mo e tōkanga foki mo e ngoue ka kuo tō mai ‘a e tapuaki pea ko e tāpuaki ko’eni kuo hulu. Na’e toe lulu’i foki moe fonua ‘i he hengihengi ‘o e 'aho ni fakafuofua nai ki he taimi 4:00 am ‘e ha mofuike ‘a ia na’e fakafuofua hono malohi ki he 5.7 M ‘i he lau ‘a e me’afua mofuike pea 'oku ta'e'amanekina foki 'eni lolotonga ia 'a e 'uha lahi mo e malohi 'a e matangi 'i hono 'omai 'e Winston.
Na'e hoko foki 'a e mofuike ko'eni kene fanguna 'a e tokolahi 'o e kakai 'o e fonua pea na'e tō tonu 'a e mofuike ko'eni 'i he kilomita nai 'e 36 ki he faka-Tokelau Hihifo 'o Nuku'alofa. 'Oku tātātaha foki ke hoko ha fakatamaki fakaenatula kehekehe 'e ua he taimi pe 'e taha 'o hange koe mofuike moha matangi malohi ka 'oku 'ikai foki pule ha taha ia ki natula.
Ko e matangi foki ko Winston ‘oku fakafuofua ia ki he Katekoli 2 (category 2) ‘a ia ‘oku kei tu’u pe ‘a e fakatokanga matangi mālohi ki he ‘Otu Tonga. ‘Oku ‘fakahoko pe foki 'a e lotu pehe ki he ‘amanaki lelei ‘e hao pe ‘a e ‘Otu Anga’ofa mei he ha'ah'aa faka-natula ‘o Winston.
