‘Ikai ha pa’anga ‘a e Pule’anga na'e mole he TASANOC Featured
Takitoa Taumoepeau Sekelitali Seniale 'a e TASANOC
8 'Aokosi, 2017. Na’e fakaha mei he ‘Ofisi ‘o e TASANOC ‘a ‘enau ta’efiemalie ki he tukuaki’i kuo fakahoko ‘e he ‘eiki Palemia ‘i Fale Alea lolotonga ‘a e ngaahi fakamalanga ‘o fekau’aki mo e sipoti.
Na’a ne mea’ ‘o pehe ai ‘oku “ta’efalala’anga” ‘a e TASANOC koe’uhi ko e ta’emaau mo e mole ai ‘a e ngaahi pa’anga he ngaahi ta’u kuo maliu atu.
Na’e pehee mei he ‘Ofisi ‘oku fakame’apango foki ko hono ‘ohake he Fale Alea ka ‘oku ‘ikai ha nau le’o ke fai ha tali mo fakama’ala’ala ‘o hange ko e tukuaki’i kuo fai.
Ka ‘oku fiefakamahino mai pe mei he ‘Ofisi ko kinautolu ‘oku nau unga ngaue mo fakaongoongo ki he ‘Ofisi ‘o e Komiti Sipoti ‘Olimipiki Fakavaha’apule’anga (International Olympic Committee, IOC).
Ko e Kautaha ni (IOC) ‘oku nau fiema’u ‘a e fakamatala pa’anga ‘osi ‘aotita’i (audited annual accounts) mei he ngaahi fonua memipa kotoa pe ‘o kau ai ‘a Tonga ni fakataha mo e Miniti ‘o ‘enau ngaahi fakataha lahi fakata’u.
Ko e talu eni ‘a e fuafatongia ‘a e TASANOC mo ‘enau fakakato ‘a e ngaahi fiema’u koeni pea ‘oku te’eki ke fakaha mai ha ta’emaau mei he IOC.
Na’e pehee foki mei he ‘Ofisi ‘o e TASANOC ko e pa’anga ko ia ne tokoni mai’aki ‘e he Pule’anga ki he folau ki Papua Niukini he Sipoti Pasifiki ‘o e 2015 ne lava lelei hono ‘aotita’i ‘e he ‘Ofisi ‘Aotita ‘a e Pule’anga pea ne fakahu atu ki he ‘Ofisi ‘o e Minisita Pa’anga pea na’e fakafiemalie ‘aupito.
Ko e tanaki atu pe ki ai na’e totongi fakahangatonu pe ‘a e ngaahi pa’anga lahi ‘o e tokoni ni ki he ngaahi Kautaha na’a nau fakahoko (service providers).
Ko ia ai ‘e ‘ikai lava ke tau pehee ne mole ha pa’anga ia he ‘Ofisi ‘o e TASANOC he na’e ‘ikai ha fe’ave’aki pa’anga ia mei he Pule’anga mo e ‘Ofisi ‘o e TASANOC ‘o hange ko e tukuaki’i kuo fai.
-TASANOC
