Kole 'a Dame Valerie Adams ke fai pe Sipoti ki Tonga ^Featured

 'Oku hā foki 'i he tohi ni 'a e fakahā 'e Adams kapau 'e tu'ulahoko ai pe a'e  sipoti pea koe toki sitepu ma'olunga ia ki he fakalakalaka 'a e sipoti 'i he fonua mo e kakai kae tautautefito ki he to'utupu.

'I he fakamatala 'a Adams he'ene tohi na'a ne fakahā ai koe faingamalie mo'oni 'eni ki Tonga ke nau ma'u 'a e taukei, ngaahi naunau mo e mala'e sipoti, ngaahi polokalama mo e vīsone ki he sipoti 'i he fonua.

Kuo mahino foki 'a hono talaki 'o e holomui 'a e Pule'anga ia  he ngaahi uike kuo maliu atu ka kuo toe 'omai 'e he Kosilio Sipoti 'a e Pasifiki 'a e faingamalie ki he Pule'anga kenau toe fakakaukau'i 'enau tu'utu'uni.

'I he lau 'a Adams ki he ngaahi kautaha ongoongo, na'a ne pehe ai 'oku totonu mo mahu'inga ke toe fakakaukau'i 'e Tonga 'enau tu'utu'uni 'o makatu'unga he ngaahi lelei 'a e sipoti ki he fakalakalaka 'a e fonua mo e lele loloa ki he kaha'u.

Na'a ne hoko atu 'e hanga 'e he sipoti ko'eni 'o tuku ha ongoongo lelei mo lavame'a 'o Tonga 'e tolonga ki he kaha'u mo e fakalakalaka 'a e fonua.

'Oku polepole foki 'a Adams hono konga Tonga pea na'a ne fiefia ke kau mai ki he teuteu 'a e fonua ki he sipoti he koe hala eni ke ma'u ai ha kakai sipoti lelei ma'a Tonga 'i he kaha'u.

'I he tui 'a Adams, 'oku totonu ke solova 'a e palopalema lolotonga 'oku hoko fekau'aki mo hono teu fai 'o e  sipoti ki Tonga pea ke tu'u fakataha 'a e fonua 'o me'angāue lelei 'aki 'a e faingamalie ko'eni.

Ko Dame Valerie Adams kuo ne 'osi 'ausia 'a e metali koula 'i he mala'e 'o e tolo shotput 'i he SIpoti Olimipiki pea toe hau foki 'i mamani he sipoti tatau.