Tangi ‘a Mateni Tapueluelu ‘i he Mole hono Sea ‘i he Fale Alea Featured
Fakafofonga Fale Alea Malōlō ‘o e Vahenga Fili Tongatapu 4 Mateni Tapueluelu
Nuku’alofa, 5 Sanuali 2016. Kuo fakahū atu ‘e he Fakafofonga Fale Alea Malōlō ‘o e Vahenga Fili Tongatapu 4 ‘a ‘ene tangi ki he Fakamaau’anga Tangi fekau’aki mo e tu’utu’uni ‘a e Tu’i Fakamaau Lahi Owen Paulsen he faka’osinga ‘o e 2015 ‘oku ta’efakalao ‘a ‘ene hoko koe Fakafofonga Fale Alea Tongatapu 4.
Na’e makatu’unga ‘a e tu’utu’uni ‘a e Tu’i Fakamaau Lahi ‘i hono faka’ilo ‘e he ‘Ateni Seniale ‘a Tapueluelu ‘o makatu’unga ‘i he ‘uhinga na’e ‘ikai totongi hono mo’ua Fakamaau’anga lolotonga ia ‘ene hoko koe Kanititeiti ki he Fili Fale Alea ‘o Novema 2014.
Ko e mo’ua ‘o Tapueluelu ko’eni na’e fe’unga ia mo e pa’anga ‘e tahamano uaafe tupu ki he kia William Clive Edwards ‘a ia koe Ministiā Lao Malōlō. Ko e mo’ua ‘eni ‘i hano faka’ilo ‘e Edwards ‘a Tapueluelu ‘i he 2011 ‘a ia koe ‘Etita ‘o e Nusipepa Kele’a ‘i he taimi koia ki he lau’ikovi’i. Na’e fe’unga mo e ta’u ‘e 3 ‘a e toutou tangi ‘a Tapuelulelu mo e Nusipepa Kele’a fekau’aki mo e mo’ua koia mo e ‘ikai ola lelei.
Na’e tu’utu’uni foki ‘e he ‘Eiki Sea ‘o e Fale Alea Lord Tu’ivakanō ke to’o ‘a e totonu ‘a Mateni Tapueluelu kene hoko koe Fakafofonga Fale Alea ‘i he ‘aho 11 ‘o Tisema 2015 hili pe ha taimi nounou mei hono fakahā ‘a e Tu’utu’uni ‘a e Tu’i Fakamaau Lahi.
‘Oku mahino mai foki ‘e Fakafofonga’i ‘a Tapueluelu ‘i he hopo Tangi ko’eni ‘e he loea Nu’usila koia ko Rodney Harrison pea ‘e fakafofonga’i pe ‘e he ‘Ateni Seniale Le’ole’o ‘Aminiasi Kefu ia. 'I he taimi tatau kuo ma'u 'a e fakamatala mahino meia WIlliam Clive Edwards 'oku te'eki totongi 'a e mo'ua ia ko'eni.
‘Oku lolotonga teuteu foki ‘a e Komisoni Fili ki hano fakahoko ha fili si’i he kaha’u vave mai ke fetongi ‘a e Sea ko’eni ‘o Tapueluelu ma’ae Tongatapu 4.
