Holo e tokolahi Fale Alea mei he 26 ki he 24 ^Featured

Nuku’alofa, 2 Fepueli 2016. Na’e hoko atu ‘a e feme’a’aki ‘a e Fale Alea ‘o Tonga ‘i he ‘aho ‘aneafi Mōnite 1 ‘o Fepueli. Na’e kamata’aki pe ‘a e Fale ‘a hono fakahoko faka’ofisiale ‘e he ‘Eiki Sea, Lord Tu’ivakanō ki he Fale Alea ‘o Tonga ‘a e tu’utu’u ni ‘a e Fakamaau’anga Lahi ‘o e fonua fekau’aki mo e memipa ‘e ua ‘o e Fale Alea ‘a ia kuo mole hona sea ‘i he Fale Alea ‘o Tonga.

Na’e kamata’aki ‘a e fakahā ‘e he ‘Eiki Sea ‘a e mole ‘o e sea ‘o Mateni Tapueluelu ‘a ia ko e Fakafofonga ia ‘o Tongatapu 4. Na’e makatu’unga ‘eni ‘i he tu’utu’uni ‘a e Fakamaau’anga Lahi ‘i he faka’osinga ‘o e ta’u 2015 ‘i he hopo ‘i he vaha’a ‘o e ‘Ateni Seniale ‘Aminiasi Kefu mo Mateni Tapuelulelu. Na’e fakahā foki ‘e he Tu’I Fakamaau Lahi ‘i he’ene tu’utu’uni ‘i he mahina ko Tisema 2015 na’e ta’e’aonga hono fili ‘o Tapueluelu ki he Fale Alea ‘o Tonga ko e te’eki e totongi hono mo’ua Fakamaau’anga.

Na’e hoko atu leva ‘a e ‘Eiki Sea ki hono fakahā ki he Fale ‘a e tu’utu’uni ‘a e Fakamaau’anga ‘i he ‘aho 29 Sanuali 2016 ke fakata’e’aonga’i mo e totonu ‘a ‘Etuate Sungalu Lavulavu kene hoko koe Fakafofonga Fale Alea ‘o e Vahenga Fili Vava’u 16. Na’e makatu’unga foki ‘eni ‘i he hopo ‘i he vaha’a ‘o Dr. Viliami Uasike Latu mo ‘Etuate Lavulavu pea tali ‘e he Fakamaau’anga na’e totongi fakafufū ‘e ‘Etuate Lavulavu ‘a e kakai fili ‘o e Vahenga Fili Vava’u 16 ke fili kiate ia. ‘Ikai ngata ai ka na’e hulu atu ‘ene fakamole ‘i he tu’utu’uni ‘a e Lao Fili Fale Alea 1989.

‘I he’ene pehē leva kuo holo ‘a e tokolahi ‘o e Hou’eiki Memipa ‘o e Fale Alea mei he 26 ki he 24 pea na’e fakamahino ‘e he ‘Eiki Sea ‘oku ‘i ai ‘a e faingamalie ‘o e memipa ‘e ua ko’eni kena toe foki mai ki he Fale Alea kapau ‘e ola lelei ‘a ‘ena tangi ki he Fakamaau’anga Tangi ‘a ia ‘oku ‘amanaki ke fakahoko ki he mahina ko Ma’asi 2016. Kapau leva ‘e ‘ikai ke ola lelei 'a e tangi 'a e ongo Fakafofonga maloloo ni pea ‘e fakahoko leva ‘a e Fili Si’i ki he sea ‘o e Vahenga Fili Tongatapu 4 mo e Vava’u 16 ‘i he ‘aho 26 ‘o Mē 2016.