"Tukuange pe kau ngoue kava kenau tau'ataina": Samiu Vaipulu ^Featured

‘Oku mahino foki kuo a’u ‘a e totongi ‘o e kava Tonga ki he pa’anga ‘e 100 ki he kilo pea ‘oku ‘ikai foki ke puli koe tu’unga ma’olunga ‘a ia ‘oku mei hiki ‘aki ‘a e peseti ‘e 400% ‘i loto pe he ta’u ‘e 2.

Kaikehe na’e ‘ohake foki ‘e he Fakafofonga Nopele Fika 2 ‘o Vava’u Lord Tu’ilakepa ‘a e kaveinga ni mo ‘ene faka’amu pe na’a malava ke pule’i ‘a e totongi ‘o e kava ‘e he Pule’anga ‘i he malumalu ‘o e va’a pule fakafuofua (competent authority).

‘Oku fakafofonga’i mai foki ‘e he fakamalanga ko’eni ‘a e Tu’ilakepa ‘a e tokolahi ‘o e kau mama kava Tonga pehe ki hotau kainga Tonga ‘i muli ‘a ia ‘oku nau fiema’u faka’aho ‘a e kava Tonga.

‘Oku mahino foki ‘a e fehanuaki ‘a e kau kava Tonga 'i he ngaahi ‘aho ni ‘i he mamafa ‘a e kava pea ‘oku ‘iku foki ke toe si’isi’i ange ai ‘a hono ma’u ‘o e kava Tonga ‘i he fonua.

‘I ha fakamalanga ‘a e Fakafofonga Vava’u 15 Samiu Vaipulu na’a ne fakamamafa’i ai ‘a e mahu’inga ke taua’ataina ‘a e tangata ngoue ki he fua ‘ene ngaue.

Na’e toe fakamamafa’i foki ‘e Vaipulu kapau leva ‘e pule’i ‘a e totongi ‘o e kava pea ‘oku totonu ke fakahoko mo e ngaue tatau ki he manioke mo e ngaahi fua kehe ‘o Tokanga.

‘Oku poupou lahi foki ‘a e kau ngoue ‘o e fonua ki he fakamalanga ko’eni ‘a Vaipulu kae tautau tefito ki he kau ngoue kava ‘i Vava’u, ‘Eua, Ha’apai mo e ongo Niua.

Na’e fakaha foki ‘e he taha ‘o e kau to kava mei he Lolo ka ‘oku ‘ikai loto ke fakaha hono hingoa koe toki faingamalie ‘eni kenau ma’u ai ha totongi lelei he koe ngaue ‘oku lahi mo taimi loloa ‘oku fai ki he kava.

Na’a ne fakamalo’ia’i foki ‘a e ‘a Vaipulu ki hono taukave’i ‘a e totonu ‘a e kau ngoue.