Fakafepaki'i Kulupu Siasi Tokaikolo Konifelenisi Kau Fakafāfine ^Featured

‘Oku fakahoko ‘a e konifelenisi ko’eni ‘i he Senitā Fakataha’anga Fa’onelua pea ‘oku kau mai ki he konifelenisi ko’eni ‘a e kau fakafofonga mei he ngaahi fonua muli, kau faifekau, kau loea, pehē ki he toketā mo e kau mataotao ‘oku nau poupou mo ngāue ki hono ta’ota’ofi ‘a hono fakaehaua mo fakamamahi’i ‘a e kau fakafāfine.

Fakatatau ki he fakamatala ‘a Joey Mataele ‘a ia ‘oku Palesiteni ‘i he Kautaha ‘a e kau Fakafāfine ‘a Tonga, ‘oku fakahoko ‘a e konifelenisi ko’eni ‘i he ‘uhinga ke fokotu’utu’u ha ngāue ki hono malu’i ‘a e kau fakafāfine pehe ki hono ta’ota’ofi ‘a hono fakamamahi’i kinautolu pehe ki hono fakakehekehe’i kinautolu ‘i he sosaieti ‘o kau kiai mo hono tāpalasia ‘enau ngaahi totonu.

Lolotonga ‘a e fakahoko ‘a e fakataha kuo tu’uta ‘a e kulupu mei he siasi Tokaikolo ‘o taki mai ‘e Faifekau Siosifa Vaki mo ‘enau pena (banner) ‘oku tohi mata’a’a ai ‘a e lea ko ‘eni “Go Back To Your Country With Your Immorality, Tonga Do Not Want Evil People” ‘a ia ko hono faka Tonga ‘oku ‘uhinga ia “Mou Foki Ki Homou Fonua Mo Homou Anga Fulikivanu, ‘Oku ‘Ikai Fiema’u ‘E Tonga Ha Kakai Anga Kovi”.

Na’e tu’u pe foki ‘a e kulupu ko’eni mo ‘enau pena ‘i he ve’e hala Taufa ‘o fe’ungatonu pe mo e afe’anga ki he Senitā Fakataha’anga Fā’onelua. Ko ia kotoa pē ‘e hū mai ki tu’a mei he Senitā Fakataha’anga Fā’onelua kuopau kene sio mai ki he pena ko’eni mo e tohi ‘oku hā ai.

Na’e fakahoko hano faka’eke’eke ‘e he ongoongo ‘a e Nepituno ‘a Faifekau Siosifa Vaki pea na’a ne fakahā ‘oku ‘ikai koe ‘uhinga ‘a ‘enau fakahoko ‘a e ngāue ko’eni koha fakatupu ha vākovi ka ko hono fakahoko pe he ‘uhinga lelei.

“Ko ‘emau tu’u ‘a mautolu ko hono mamahi’i ‘a e ‘Otua na’e tuku kiai ‘a e fonua ‘a ia ‘oku fehi’a ia he fa’ahinga me’a koia ‘oku fokotu’utu’u ‘e he fa’ahinga konifelenisi pehe ni,” koe fakamatala ia ‘a Faifekau Vaki. Na’e pehē foki ‘e Vaki ‘oku ‘ikai ko hano toki fakahoko ‘eni ka ‘oku toutou fakahoko pea ‘oku tali ia ‘e he ngaahi fonua ‘o tupu mei heni ‘a hono fakangofua ‘a e mali ‘a e tangata mo e tangata ‘a ia ‘oku tupu ai ‘a e mahaki ‘etisi.

Na’e toe fakahā foki ‘e Faifekau Vaki ‘oku ‘i ai ‘a e lau kiai ‘a e Folofola pea ‘oku tu’u pe ‘a e ngaahi veesi Folofola koia ‘i he pena kuo nau teuteu. “Ko e ‘uhinga foki ia na’e tutu ai ‘a Sōtoma mo Komola ko e fakasōtoma,” koe hoko atu ia ‘a Faifekau Vaki.

‘Oku tui ta’e toe veiveiua ‘a Faifekau Vaki ko e kamata ‘eni ‘a e hake mai ‘a e fa’ahinga fokotu’utu’u ko’eni ki he fonua pea ‘oku totonu ke fakafepaki’i ‘aki ‘a e mālohi taha. "Ko ‘emau tu’u he ‘aho ni ke fakahaa’i pe ki he fonua ‘a e anga ‘emau tui he koe fonua lotu ‘eni,” koe faka’osi ia ‘a Faifekau Vaki.

Na’e fakahā foki ‘e Joey Mataele ‘a ia koe Palesiteni ia ‘a e Kautaha ‘a e kau fakafāfine ‘a Tonga ‘oku ‘ikai fekau’aki ‘a e konifelenisi ‘oku nau fakahoko mo ha feinga ke tali ha mali faka tangata ka ‘oku taumu’a ia ke fakasi’isi’i hono tāpalasia mo fakamamahi’i ‘a e kau fakafāfine ‘o ‘ikai ngata pe ‘i Tonga ni ka ko mamani foki.

“Ka fakahoko ha ngaahi me’akai ‘i ha kātoanga pe koha teuteu fale mo ha fakama’a ‘api kuo pau ke ‘i ai e kau leitī ke tokoni pea ‘oku ‘ikai sola kiai ‘a Tonga ni,” koe fakahā ia ‘e Joey ki he ongoongo ‘a e Nepituno. Na’e toe fakahā foki ‘e Joey ‘oku lahi mo e ‘aonga ‘o e fa’ahinga kakai ko’eni ki he sosaieti pea ko kinautolu koe kau Tonga pe.

‘I hano ‘eke kia Joey pe koe hā ha’a ne lau ki he fakahā loto ‘oku fai ‘e he Kulupu mei he Siasi Tokaikolo, na’a ne fakahā ai “’oku tau’ataina pe foki ‘a e kakai kotoa ia ‘ki he’enau tui mo e fakakaukau kā koe me’a pe ‘oku mau ongo’i ‘oku mau ta’elata homau fonua totonu pea ‘oku fehu’ia ‘e he kau folau mai ki he fakataha ni pe koe fe ‘a e ‘Otu Motu Anga’ofa?.

‘Oku ‘amanaki ke faka’osi ‘a e konifelenisi ko’eni ‘i he ‘aho Tu’apulelulu ‘o e uike ni.